Kigutigissarnermut ullorititaq, illoqarfinni nunaqarfinnilu kigutigissartarnermut tunngatillugu pitsaassunik ileqqoqarnissap pingaaruteqassusaanik ersersitsisunik sammisaqarnikkut, 14-issaannik ingerlanneqarpoq.

 

Kigutigissarnermut ullorititaq nuannersoq eqqaamaneqartussarlu
Tasiilami kigutilerivimmi sulisut meeqqanut sammisassanik assigiinngiiaanik ullormik nuannersuutitsisunik eqqaamaneqartussanillu piareersaasimapput. Atuartut ilinniartitsisullu klassikkuutaarlutik kigutilerivimmut pulaartinneqarput, tassani kigutilerisut pisortaannit Nina Richterimit kigutilerivimmilu sulisunit tikilluaqquneqarlutik, kigutit saligutaannik qaqorsaatitassaannillu tamarmik tuniorarneqarlutik.

 

Atuartut allagartarsuaq kigutilerivimmi sulisunit saqqummerneqarsimasoq Kariusimik Baktusimillu assiliartalik atorlugu Karius Baktusilu ilisaritinneqarput. Tamatumani atuartut -amerlaqisunut allaat atuartunut annernut nuannaarutaaqisumik- nujaasalerlutik niaqqutik putukkut anillatsillugit Kariusitut Baktusitullu assilisissinnaapput. 

Nal. 13.30 aamma 14.30 kigutilerivimmi sulisut illoqarfimmi arpatitsipput. Arpatitsinerni tamani - meeqqat amerlanerullutik- 30-it 40-illu akornanni arpaqataapput. Arpannerni tamani sukkanerpaat pingasut akissarsitinneqarput, tamatumalu saniatigut peqataasut tamarmik akornanni tallimanik eqqugassaqarluni. Eqqugassat tassaapput taski angalaarluni atorneqartartoq, meeqqat sinngusaat kigutinut tunngasunik saqqallit, Lego, kigutigissaat innaallagissamoortoq, imissamaaserfiit, puussiat annoraamernit ipullit il.il. 

  

 

Kigutilerivimmi pulaarneq
Silami sammisat ingerlanneqarneranni kigutigissaasoq Johanne kigutilerivimmi pulaartunik angallassivoq, kigutit pillugit oqaluttuarluni il.il.
Kigutilerisut Martina aamma Roger kigutit piikkat putoqangaatsiaqisut aanaveersaammut ikineqarsimasut bakkinut marlunnut ilillugit takutippaat, atuartut aaqqaserlutik putunullu misissuummik sakkulerlutik kigutinik taakkunannga misissuipput. Atuartuni tamanna nuannarineqangaarmat misiliiniarlutik siuleriiaat amerlapput. Atuartut alapernaaqisut amerlaqisut kigutaasiortup Malup sulinera malinnaavigaat.

 

 

Tasiilap kigutileriviani kigutilerisut pisortaat Nina Richter naapertorlugu kigutigissarnermut ullorititaq seqinnarilluni anorlersoq nuanneqisumik ingerlanneqarpoq.
 

 

KIGUTIT INUUNEQ TAMAAT ATASUSSAAPPUT!
• Ullaakkut unnukkullu kigutitit salilluartakkit
• Meeqqat qulinik ukioqalernissaata tungaanut kigutigissarnerani ikiortaruk
• Kigutit qaqorsaataat fluoreqarneq - ajornanngippat 1450 ppm-imik fluoritalik atortaruk
• Ulluinnarni mamakujuit, sodandit saftilu unitsikkit 

Attavissaq
Kigutilerisut qullersaat e-mail: sundhedsledelsen@peqqik.gl.