“Suliffeqarfiit inuiaqatiinni akisussaaffitsik annertunerusoq tigujartorpaat, tamanna Allorfiup tungaaninngaanniit tapersersorlugu ikorfartuiniarpugut aanngajaarniutinut aningaasanoornermullu politikkeqalernissaq tunaartaralugu”, Allorfimmi aqutsisoq Birgit Niclasen oqarpoq, nangillunilu:

“Suliffeqarfiit tamarmik aanngajaarniutinut aningaasanoornermullu politikkeqalernissaq isummerfigisimanissaat pingaaruteqarpoq, qanoq angitigigaluarpata mikitigigaluarpataluunniit. Nalunngilarput suliffeqarfinni sulisuni aanngajaarniutinik aningaasanoornermulluunniit ajornartorsiuteqartoqartartoq, tamannalu suliffeqarfimmi aamma nammanneqartartoq. Taamaammat aangajaarniutinut aningaasanoornerlu pillugit politikki suliarineqarnissaa kaammattuutigaara, sulisut peqqissusaat atugarisaallu suliffeqarfiup sulisuminut tapersiinerminik pilersitsinermigut pittanngueqataassammat.”

Allorfiup najoqqutassiaa suliffeqarfinnut aangajaarniutinik aningaasanoornermillu suliaqarnermi piviusorsiortumik siunnersuuteqarpoq qanoq taakkununnga politikki imaqassanersoq, paasissutissiillunilu katsorsartinnissamut neqeroorutinik. Najoqqutassiap aammattaaq imarai assersuutit ersersitsisinnaasut qanoq aanngajaarniutit aningaasanoornerlu suliffeqarfissinni maleruagassaqassanersut.

Suliffeqarfiup aanngajaarniutinut aningaasanoornermullu politikkia ataatsimoorussatut akuerineqarnissaa pingaaruteqarpoq, tamanna aamma suliffeqarfiup iluani pissutsinut pitsanngorsaataaqataasinnaammat, taammaammat aqutsisut politikki ineriartortinneqarnerani sulisortik aalajangeeqataanissaannut ilaateqqunaqaat, politikki annertunerusumik suliffimmullu pitsaasumik sunniuteqarnissaanut iluaqutaassammat.

Suliffeqarfiit mikinerit Suliffeqarfinni aanngajaarniutit aningaasanoornerlu pillugit najoqqutassiaq naanerusoq atorsinnaavaat. 

Sulisitsisut (GE) Kalaallit Nunaanni Sullivinnik Nakkutilliisoqarfimmullu najoqqutassiaq saqqummiunneqarnikuuvoq, taakkulu aamma taassumunnga paasissutissanik siaruartereqataallutik.

Annertunerusumik paasisaqarusukkuit Allorfiup ningiuat saaffigiuk, Birgit Niclasen, 346652 imaluunnit e-mailia: bivn@allorfik.gl. 

www.allorfik.gl



Najoqqutassiat uani aasinnaavatit:

Upalungaarsimanermut allakkiaq

Suliffeqarfiit aangajaarniutit pinnguaatillu pillugit suliniuteqarnerannut najoqqutassiaq

Suliffeqarfiit aanngajaarniutit pinnguaatillu pillugit suliniuteqarnerannut najoqqutassiaq naalisagaq