Charlotte arnat ilumikkut nappaataannik, naartunermik erninermillu immikkut ilisimasalittut nakorsaanerusoq, Syddansk Universitetimilu (SDU) aqutsisutut qaffasissumik ilinniagalittut masterinngorsimasoq (MBA), septembarip ulluisa aallaqqaataanni atorfinissaaq. Charlotte ukiuni kingullerni tallimani Odense Universtetshospitalimi naartusunut ernisunullu immikkoortortami nakorsaanertut sulivoq, tassanngalu siorna sulinngiffeqalerluni. Sulinngiffeqarneq nunatsinnut inuusunnermini aasami najorsimasaminut utissalluni takorluukkaminik piviusunngortitsinermut atorneqarpoq. Tamanna Qaqortumi Peqqinnissaqarfik Kujataani qitiusumik napparsimmavimmi nakorsatut atorfininnikkut piviusunngorpoq.
” Ullut tamaasa suliartorninni takkunnera pingaaruteqartoq misigalugu uannut isumalerujussuuvoq” Charlotte Mumm Ring misigisani pillugit oqarpoq.
Napparsimasunik sullissinermini tamatigut sullitami pisariaqartitaanik ukkassinissaq qitiutikkini, aqutsinermilu suliassat sulinermini ilinniaqqinnerminilu ilaajuartarsimasut, Charlotte oqaluttuarportaaq.
Charlotte Mumm Ring pingasunik; aqqaneq marlunnik, 17-inik 20-inillu ukiulinnik meeraqarpoq. Maanna Qaqortumut nuunnissaminut pikivoq. Charlotte Peqqinnissaqarfimmit tikilluaqquneqarpoq suleqatigiinnissarlu qilanaarineqarluni.