Assi: Emil Nørgaard Stach

Arfininngorneq unnukkut Peqqissutsimut Naalakkersuisoqarfik, Kalaallit Nunaanni Timersoqatigiit Kattuffiat aammalu Elitesport Greenland timersornermi peqqissutsimilu maligassiuisunut nersornaasiipput. Maligassiuisut Show-imi nersornaasiineq nipilersortunik, qitittunik isiginnaartitsisartunillu akunnermiliunnertalimmik aliikkusersuisoqarpoq. Isiginnaartitsineq KNR TV-kkut toqqaannartumik aallakaatinneqarpoq.

- Pingaaruteqarpoq suliniutinik pitsaasunik timillu aalatinnerulernissaanut siuarsaarusullutik piumassuseqarluartut saqqummiunnissaat. Inuit taakkua annertuumik suliniuteqartut tamatsinnullu isumassarsisitsisinnaasut suliaminnik nersualaarneqarnissaat naleqquppoq. Timip aalatinnerani pingaaruteqarpoq ataatsimoornisssaq pissutigalugu pingaaruteqartumik iliuuseqaraangatta allanillu peqateqarluta iliuuseqaraangatta ilorrisimaarnerulertaratta, peqqinnerulertaratta naleqarnerulersutullu misigisaratta, taama Peqqissutsimut Naalakkersuisoq, marlunnik nersornaasiisoq, oqarpoq.

Ukioq manna Atuarfik Eqeersimaartoq tassaavoq Oqaatsuniit, Oqaatsup Atuarfia. Atuarfiup periarfissat atorluarlugit timi aalatinnissaanut atuarnerup nalaani pisusissamisoornissaa ingerlataraa. Oqaatsut Atuarfiata atuartut angajoqqaavi suleqatigalugit timip aalatinnerunissaanik suliaqangaatsiarsimapput, atuarfiullu paasivaa atuartut qiimanerulersut ilikkagaqarnissamullu piareersimasut.

Ukioq manna Suliffeqarfik Eqeersimaartoq tassaavoq Qeqqata Kommunia, kommuni sulisut atugarissaarnerulernissaat timiminnillu aalatitsinerulernissaat peqqinnerulernissaallu anguniagaraa. Kommunip suliniut ima qulequtalik aallartippaa: ”Qeqqata Kommuniani Peqqinneq atugarissaarnerlu”. Inuummarissaasut 19-it ilinniartinneqarsimapput, taakkuuppullu suliffeqarfimminni sammisassat peqqinnartut aallarnerneqarnissaanut attatiinnarnissaanullu suleqataasussat. Ukiuni tulliuttuni Qeqqata Kommuniata kommunip nunaqarfinni suliffeqarfiini peqqinnerulernissamik atugarissaarnerulernissamillu sulineq aallutissavaa.

Ukioq manna Inuaqatigiinni Eqeersimaarluartumut ajugaasoq tassaavoq kajumissuseqarluartoq, Anton M. Petersen, takutitsivorlu innuttaasut ataasiakkaat timi aalatinnerulernissaanut qanoq annertuumik pitsaasumillu iliuuseqartoqarsinnaanersut. Anthon sunngiffini atorlugu arpatsitsinermik illoqarfinni arpatsitsiffiusuni innuttaasut nuannaarutigisaannik Tour de Nuuk-mmik aaqqissuisarpoq.

Tour de Nuuk pingaartumik Nuummi ingerlanneqartarpoq, kisianni Antonip sineriak tamakkerlugu taamatut arpatsitsisarnissani sulissutigaa. Kingullertigut Arctic Umiaq Line aamma GrønlandsBanken suleqatigalugit Nuummi, Sisimiuni, Ilulissani aamma Qeqertarsuarmi Sarfaq City Run-imik taallugu arpatitsisimavoq. 

Ukioq manna Peqqissutsimut Naalakkersuisoqarfik immikkut ittumik nersornaasiivortaaq. Nersornaasiineq tamanna Kofoeds Skole-mut tunniunneqarpoq pissutigalugu Kofoeds Skolep peqqinnartunik ataatsimoortitsinerup pingaaruteqassusia ersersimmagu. Innuttaasut inooqatigiinnikkut atugarliortut Kofoeds Skolemut ornigussinnaapput inuunermilu ingerlaqqinnissamut imminut ikiornissamut ikiorserneqarsinnaallutik. Ukioq manna atuarfiup atuartut sulisullu timimik aalatitsinerunissaat aallussimavaa, taamaasilluni atuartut allatigut inooriaatsiminnik allannguinissamut, soorlu nerisaqarnikkut aanngajaarniutinillu atuinikkut, eqqarsaatigisalersimavaat. 

Peqqissutsimut Naalakkersuisoqarfiup nersornaaserneqartut tamarmik pilluaqquaat. Peqqik.gl-imi Ukioq manna Eqeersimaartut immikkullu nersorneqartut pillugit naatsumik isiginnaagassiat takusinnaavatit takoqqillugilluunniit. Tassani aamma atuarsinnaavat nammineq suliffeqarfinni atuarfinniluunniit timi aalatinnerulernissaanut unammisitsinermut qanoq peqataasinnaanerlutit.

Paasisaqarnerorusukkuit naalakkersuisumut allatsi Inger Heilmann Larsen oqarasuaat: +299 539371 imaluunniit e-mail: ihla@nanoq.gl aqqutigalugu attavigineqarsinnaavoq