Suliffeqarfiit imigassamik aalakoornartortalimmik aningaasatigut iluanaaruteqartut ulluni makkunani sapinngisartik tamaat atorlugu politikeriusugut imigassaq pillugu inatsit atuutilernissaa akorngusersorniarpaatigut. Suut tamarmik atortariaqarpasipput taamaattoq eqqortoq eqqugaarpasinniarpoq.

Oqaatigisat eqqunngitsut
Arfininngormat Nicolai Nissen immiorfimmik neriniartarfimmillu pisortaasup oqaatigaa imigassaq pillugu inatsisip “Nuummi kulturikkut inuuneq ukiumut tusarnaartitsinerit 100-t annaanissaannik” kinguneqartitsissasoq. Nicolai Nissen naapertorlugu immiorfiit siunissami tusarnaartitsinerit aningaasatigut tapersersuisinnaajunnaarnerannik tunngaviginerarpaa. Tamannali eqqunngilaq. Taamaakkaluartorlu oqaatiginiagaq Sermitsiaq.AG -p nittartakkakkut aviisiatigut angisuumik qulequtserneqarpoq. 

Imigassaq pillugu inatsisip suliffeqarfiit kulturikkut pisartut aningaasatigut tapersiinissaat taamatullu suliffeqarfiup atia ilisarnaataalu takutinnissaanut akorngusersornavianngilaa.  Imigassaq aalakoornartortalik pillugu ussassaarisoqaqqusaajunnaassammat aningaasatigut tapersiisoqartillugu imigassaq aalakoornartortalik pillugu assilissanik oqaatsinilluunniit innersuussisoqarsinnaajunnaassooq. Pingaaruteqarpoq ilanngutissallugu inatsimmut siunnersuummi suliffeqarfiit najukkami eqqumiitsuliortut tusarnaartitsinerillu aningaasatigut tapersersorneqarnissaannut Naalakkersuisut akorngusersuinianngimmata.

Meeqqat pillugit
Immialiortarfiup pisortaata aamma kamaatigaa inatsimmut siunnersuutip imerniartarfiit sapaatini matujaartassammata juulliaqqami juullimilu siullermi matoqqasassammata.  Imerniartarfiit ammasarnerisa sivikillineratigut inunnut imigassamik aalakoornartortalimmik tuniniaanermik inuussutissarsiortunut paasisinnaavara iluaagineqassappat. Taamaattorli isumaqarpunga meeqqat pisariaqartitaat pingaarnerpaamik salliutinneqartariaqartut. 

WHO´p innersuussutai
Inatsisissatut siunnersuut maanna Inatsisartuni oqallisigineqartoq nunarsuarmi peqqissutsi pillugu suliniaqatigiiffiup WHO-p imigassamik qanoq atornerluijunnaarsinnaanermik misissuinerisa ilisimasaannit tunngaveqarpoq. Imigassaq aalakoornartortalik pillugu iliuusissatut pilersaarutaa tassaavoq takussaannginnerusumik, tikikkuminaannerusumillu tuniniarneqartarnissaat minnerusumillu ussassaarineq. Nunani arlalinni misissuinerit takutippaat taakkunani pingasuusuni iliuutsit imigassamik aalakoornartortalimmik imertarnerup annikillisimaneri taamaasilluni imigassamik aalakoornartortalimmik atornerluinerup kingunipiluisa appartinnissaanik kinguneqartarluni.

Kalaallit Nunatsinni imigassaq aalakoornartortalik pillugu annertuumik ajornartorsiuteqarpugut tamannalu pingaartumik meeqqatsinnut inuusuttortatsinnullu eqquinerluppoq. Taamaattumik aamma pingaaruteqarpoq uagut politikeriusugut aalajangiusimanninnissarput pingaaruteqartoq inatsillu meeqqanut iluaqutaasoq akuersissutigalugu. Tamanna kisiat iliuusissaanngilaq. Kisianni alloriarneruvoq pitsaasoq ajunngitsumik siunertaqartoq."

Paasisaqarnerorusukkuit naalakkersuisumut allatsi Nauja Møller oqarasuaat +299 58 26 54 imaluunniit e-mail: nmoe@nanoq.gl attavigineqarsinnaavoq