Ullumikkut imigassaq pillugu inatsit nutaaq Inatsisartuni amerlanerussuteqartut akuersissutigaat, 25-t akuersipput pingasut akerliullutik. Imigassaq pillugu inatsit nutaaq 1. marts 2018-imi atuutilissaaq.

- ”Imigassaq pillugu inatsisip Inatsisartunit akuersissutigineqarnera meeqqatsinnut ajugaaneruvoq. Tulluarporlu inatsisip ullumikkorpiaq novemberip 20-anni, tassa FN’ip nunarsuaq tamakkerlugu meeqqanut ullorititaanni akuersissutigineqarnera. Imigassaq pillugu inatsit meeqqatta pitsaanerusumik siunissaqarnissaannut alloriarneruvoq annertooq pingaaruteqartorlu,” Peqqissutsimut Naalakkersuisoq, Agathe Fontain oqarpoq, nangillunilu:

- ”Imigassamik atornerluisuunermik pinaveersaartitsiniarluni sulineq maanna naammassinngilaq. Imigassamik ajornartorsiutit peerneqassappata suliniutit assigiinngitsorpassuit pisariaqartinneqarput imigassamillu atuineq meeqqatsinnut inuusuttortatsinnullu ajoqutaanngitsoq anguniagaq angussagutsigu tamatta tapeeqataanissarput pisariaqarpoq. Ataatsimut periusissiaq Inuuneritta II sulissutigiinnassavara taassuminnga qulakkeerneqassaaq nunatsinni innuttaasut tamarmik pitsaasumik sivisuumillu inuuneqarnissaannut pitsaanerpaamik periarfissaqarnissaat.”

Imigassaq pillugu inatsimmi tunngavigineqarput imigassaq pillugu sunniuteqarluartumik pinaveersaartitsinermut Nunarsuaq tamakkerlugu peqqinnissamik suliniaqatigiiffiup WHO’p innersuussutai – immikkut imigassamik ersarissuutitsinnginnissaq tikikkuminaatsuutitsinissaq aamma pilerisaarinnginnissaq pillugit. 

Imigassaq pillugu inatsisip imarisai naatsumik:
Imigassaq pillugu inatsimmi imigassanik aalakoornartortalinnik tuniniaanerit sassaalliinerillu tamarmik pineqarput.

• Imigassat 2,25 % sinnerlugu aalakoornartortallit niuertarfinni pisiassanit allanit assersorneqassapput.

• Imigassanik aalakoornartortalinnik pilerisaarineq inerteqqutaalerpoq. Kisiannili aningaasanik tapersiinermi suliffeqarfiup aqqa ilisarnaataalu nuisatinneqarsinnaapput. 

• Imigassanik aalakoornartortalinnik tuniniaaneq piffissani makkunani pisassaaq:
Ataasinngornermit tallimanngornermut nal. 09.00-18.00.
Arfininngorneq nal. 10.00-14.00.
Sapaatini nalliuttunilu imigassanik aalakoornartortalinnik tuniniaasoqaqqusaanngilaq.

• Imigassanik aalakoornartortalinnik sassaalliineq piffissani makkunani pisassaaq:
Ataasinngornermit sisamanngornermut nal. 12.00-24.00.
Tallimanngorneq aamma arfininngorneq nal. 12.00-03.00. Sapaatini nalliuttunilu nal. 12.00-24.00. Matuma saniatigut juulliaqqami juullimilu matoqqasassapput, kiisalu ukiutoqqami juullillu naggataani nal. 12.00-03.00-imut ammasassallutik.

• Inunnut aalakoortunut imaluunniit inunnut 18-it ataallugit ukiulinnut imigassamik tunisineq sassaalliinerlu inerteqqutaaginnassapput

• Inuit 18-it ataallugit ukiullit, niuertarfimmi ilinniartut aamma saqinermi ilinniartut minillugit, sulisutut imigassamik tunisisinnaanatillu sassaalliisinnaanngillat. 

• Inuusuttut 18-t ataallugit ukiullit, 18-ileereersimasumik inuusuttumut immikkut akisussaassuseqartumik ilagisaqartinnatik nal. 20.00-ip kingorna sassaalliisarfinniissinnaannginnerat atuutiinnassaaq. 

• Sulisut imigassamik tunisisartut imaluunniit sassaalliisartut akisussaassuseqartumik imigassamik tunisinermut aamma sassaalliinermut pikkorissarnermut Naalakkersuisut neqeroorutigisaannut peqataasimassapput.

• Piumasaqaataavoq, pisortani namminersorlutillu suliffeqarfiit tamarmik imigassaq pillugu politikkimik suliaqarsimanissaat.

• Imigassamik tunisisinnaanermut akuersissummik qinnuteqartut tamarmik tuniniaaffissaminni imaluunniit sassaalliiffimminni  imigassaq pillugu politikkimik suliaqassapput. Imigassaq pillugu politikkip ilusissaanik Naalakkersuisut suliaqassapput.

• Nerisassanut annissassanut atatillugu imigassamik aalakoornartortalimmik pisinissaq periarfissaajunnaassaaq.

• Tunisinerit sassaalliinerillu tamarmik imigassamik tunisinissamut akuersissummik piumasaqaateqaannassapput. Imigassamik tunisinissamut akuersissummik kommunalbestyrelsemut qinnuteqartarneq ingerlaannassaaq.

• Politiinut, nunaqarfimmi aqutsisunut, meeqqat inuusuttullu pillugit kommunimi oqartussaasunut kiisalu peqqissutsimut pinaveersaartitsinerlu pillugit kommunimi aqutsisunik tusarniaareernikkut kommunalbestyrelse imigassamik tunisinissamut akuersissutinik tunniussisinnaavoq. Imigassamik tunisinissamut akuersissutit ukiunut pingasunut atuuttussanngorlugit tunniunneqartarput.

• Ataasiaannartumik atuuttussamik akuersissutini, tassa aaqqissuussinernut tamanut ammasunut soorlu tusarnaartitsinerni imigassamik tunisinissamut akuersissutini, imigassanik 16 %-it sinnerlugit aalakoornartulinnik sassaalliisoqaqqusaanngilaq.

• Ataasiaannartumik atuuttussamik akuersissutini sassaalliineq nal. 12.00 – 24.00-mut pisassaaq, kisiannili tallimanngornerni arfininngornernilu nal. 03.00-p tungaanut sivitsuisoqarsinnaalluni.

• Sumiiffinni inuit najugaqarfiisa avataanni takornarissanut imigassamik sassaalliisinnaanermut “takornariat pillugit akuersissummik” immikkut ittumik qinnuteqarnissaq periarfissaavoq.


Annertunerusumik paasissutissanik perusukkuit naalakkersuisup allattaa, Nauja Møller saaffigiuk, mobilimut: +299 58 26 54 imaluunniit e-malimut: nmoe@nanoq.gl