-”Nerisavut imikkavullu peqqissutsitsinnut malinnaasinnaassutsitsinnullu sunniuteqangaartarput. Minnerunngitsumik atuartut ullup ingerlanerani unamminiarnartut qaangissagunikkit piumasaqaatillu eqquutitillugit peqqinnartunik qaarsillarnartunillu nerinissartik pisariaqartippaat”, taama Peqqissutsimut Naalakkersuisoq, Agathe Fontain, oqarpoq nangillunilu:

-”Neriuppunga atuartut taquaasivitik nutaat Mmmh Mamaq nuannarissagaat, aamma taqussanut peqqinnartunut mamartunullu ullormi atuarfiusumi atuartunik nukissaqalersitsisinnaasunut atorneqassasut.”

Qulequttap Mmmh Mamaq atorneratigut Peqqissutsimut Naalakkersuisoqarfiup ukiuni makkunani peqqinnartunik nerisaqarnissamut pisortatigoortumik kaammattuutit maleruarpai: Nerisaqarnermut Timigissarnermullu Siunnersuisoqatigiit nerisaqarnermut innersuussutai qulit.

Taqussat peqqinnassappata nerisaqarnermut innersuussutit qulit maleruarneqassapput: Taratsut, orsoq sioraasallu atorneqarpallaassanngillat. Paarlattuanik naatitat, karrit aserorterneqanngitsut, qallersuutissat, aalisakkat paarmallu atorneqassapput. Atuartut imermik nillaarissumik atuagaasivimminniititaqarunik atuarnissamut piareersimalluassapput.

Innuttaasut peqqinnissaannik suliniummi Inuuneritta II-mi nerisaqarneq suliniuteqarfissat ilagaat. Nerisaqarnermi anguniakkat tassaapput innuttaasut Nerisaqarnermut Timigissarnermullu Siunnersuisoqatigiit kaammattuutaat maleruassagaat assigiinngisitaartunillu peqqinnerulersitsisunik nerisaqassallutik, kiisalu pualavallaarnerup pualanerullu ineriartornera killilersimaarneqassasoq.

Inuuneritta II aamma nerisaqarneq pillugu Peqqik.gl-imi atuarnerugit. Nittartakkami Atualiiliv.gl aamma atuartuutinnik eqqortumik nerisaqartitsineq pillugu siunnersuutitsialaat takusinnaavatit.

Paasisaqarnerujumallutit Naalakkersuisup allattaa Nauja Møller attavigiuk mobilikkut: +299 58 26 54 imaluunniit e-mailikkut: nmoe@nanoq.gl