HIV tappiorannartuuvoq virusi inuup nappaatinut akiuussinnaassusaanik aseruisartoq. Tamatuma AIDS-imik nappaateqalerneq kingunersinnaavaa. Ullumikkut sunniuteqarluartunik, napparsimasut amerlanersaannut ukiorpanni nappaatip ersiutaannik ingalassimatitsisartunik, nakorsaateqarpoq. Ukiuni kingullerni nappaammik tunillatsittartut ukiumut ataatsimiit pingasunut amerlassuseqartarput. Tunillatsittut agguaqatigiissillugit 50-it pallingajallugit ukiuliusarsimapput.

-”Inuusuttut marluk HIV-mik tunillatsissimanerat ernumanaateqarpoq. Manna tikillugu HIV-mik tunillatsittartut utoqqasaajunerusarsimapput. Tunillatsissimasut nutaat taakku marluk, HIV-ip inuusuttut akornanni tuniluutilersinnaanera navianarnerulersippaa. Innutaasut sillimmarterlutik usuup puuanik atuinikkut imminnut illersorsinnaaqqullugit, pisup ammasumik avammut nalunaarutiginissaa toqqarparpput ,” Nunatsinni Nakorsaaneq Henrik Trykker oqarpoq nangillunilu:

-”Nunatsinni peqqinnartumik atoqatigiittarnissap anguniarnissaanut annertuumik unammilligassaqarpugut. Kinguaassiuutitigut nappaatit annertuumik atugaanerat naartuersittartullu amerlanerujussuat, tamatuma ilaatigut takussutissartaraa. Ajornartorsiut anigussagutsigu ukkassilluta pisortaqarfiit akimorlugit iliuuseqartariaqarpugut. Peqqinnarnerusumik atoqatigiittarnissamut suleqataasinnaasut amerlaqaagut, minnerunngitsumik inuusuttut namminneq, angajoqaat, atuarfiit kommunit peqqinnissaqarfillu.”

Inuk HIV-mik tunillatsissimasoq paasineqaraangat, atoqatigisimasat tunillatsissimasinnaanermut misissortissinnaaqqullugit, peqqinnissaqarfimmit paasiniaaneq aallartittarpoq.

HIV-mik tunillatsissimasunik nalinginnaasumik ataatsimuualaaqateqarneq tunillatsinnissamut navianaateqanngilaq. Taamatuttaaq HIV attuinikkut, atortutigut -soorlu imerfitsigut, nerinermi atortutigut imal. quukkut annakkulluunniit tunillaassinnaanngilaq. Illersuuteqarani atoqateqarnikkut HIV-mik tunillatsittoqarsinnaavoq. Usuup puuanik atuineq HIV-mut illersuutaavoq. Usuup puui akeqanngitsut peqqinnissaqarfimmi aaneqarsinnaapput.


Kinguaassiuutitigut nappaatinik pitsaaliuinissamut atatillugu immikkut iliuuseqarnissamut, Naalakkersuisut 2015-imi ukiakkut aningaasaliipput. Ukiumi nutaami isumannaatsumik atoqateqarneq pillugu, nammineq piumassutsimik suliniaqatigiiffimmit IMCC SexInuk-imit ingerlanneqartumik paasititsiniaasoqassaaq. Paasititsiniaanerup oqariartuutaa pingaarneq tassaavoq: Imminut paarigit, usuup puua atoruk.

Tamatuma saniatigut peqqinnissaqarfik Diskomilu peqqinnissaqarfiup qitiusumik immikkoortuani atuarfeqarfik, 2014-imiit 2015-imut, inuusuttup nammineq timiminik ataqqinnillunilu illersuinissaanut nukissanik tunineqarnissaa qitiutillugu, meeqqat atuarfianni atoqatigiittarneq pillugu ilinniartitsinerup qaffasissumik pitsaassuseqarlunilu kinguneqarluartumik ingerlanneqarnissaanik qulakkeerisussamik ataatsimoorussamik misiliummik suliniuteqarput. Suliniummi tamatumani misilittakkat nunatta sinneranut siammarterneqassapput.

Paasissutissat sukumiinerusut Nunatsinni Nakorsaaneq Henrik Trykker oqarasuaatikkut (+299) 34 51 91 imal. e-mail-ikkut: hent@nanoq.gl attavigalugu pissarsiarineqarsinnaapput.