Assi: Ulrik Bang

Innuttaasut peqqissusiannik misissuinerit angisuut tallimassaat 2017-18-imi ingerlanneqassaaq, tamatumani siunertarineqarluni inuiaqatigiinni peqqissutsip misissorneqarnissaa, pingaarnertut  Inuuneritta II-mi sammineqartut misissuiffigineqassallutik.

Misissuineq Peqqissutsimut Naalakkersuisoqarfiup, Statens Institut for Folkesundhedip kiisalu Steno Diabetes Centerip akornanni suleqatigiilluni suliarineqarpoq. 

Innuttaasut peqqissusiannik misissuineq ilisimatuussutsikkut misissuinissamik aammattaaq siunertaqarpoq, siornatigut misissuisarnerni sisamaasuni peqataareersimasut peqqissusiannik misissuinermik ilaqarluni. Misissorneqartut ilaatigut tassaapput pujortartarneq, nerisaqarneq, timimik atuineq, sukkornermik nappaateqalernissamut pissutaasinnaasut, uummatip taqaasigut nappaatit, peroriartornermi atukkat aamma atugarissaarneq. 

Nuna tamakkerlugu misissuinissarsuarmi tassani inuit 2.800-t missaannik amerlassusillit nalaatsornikkut makitaasut peqataanissaannik neqeroorfigineqarput, aammalu pingaaruteqarluni makitaasimasut amerlanerpaartaasa misissuinermut peqataanissaat.   

- Ukioqatigiiaani assigiinngitsuni nalaatsornikkut makitaasut taakku amerlanerpaartaasa peqataanissaat uagutsinnut pingaaruteqartorujussuuvoq, tamanna Kalaallit Nunaanni innuttaasut peqqissusiannik siammasissumik takussutisseeqataassammat, ilisimatusarnermi suleqataasoq Ingelise Olesen, misissuinermi ulluinnarni ataqatigiissaarisoq, erseqqissaavoq.   

Inooriaaseq tunngavigalugu nappaatit pilersartut annertuumik misissuiffigineqarnerisa saniatigut inuusuttut eqqarsartaatsikkut peqqissusiannik, kiisalu utoqqaat ulluinnarni inuunerminni qanoq atugaqarnerannik misissuineq immikkut sammisaqarfiuvoq. 

- Nuna tamakkerlugu misissuinermi matumani inuusuttut eqqarsartaatsikkut peqqissusiat aamma atugarissaarnerat nutaatut immikkut sammivarput, taamaattumillu aamma inuusuttuaqqanik 15-iniit 17-it tikillugit ukiulinnik peqataasussanik makitsisoqarluni. Neriuutigaarput inuusuttut taakku peqataarusussuseqassasut, tamaalillutik taakku aamma Kalaallit Nunaanni inuusuttut atugaasa qanoq ittuunerannik paasisaqarnissatsinnut tapertaassammata, siunnersortaaneq aammalu misissuinermut akisussaasoq Christina Viskum Lytken Larsen oqarpoq. 
-
Innuttaasut peqqissusiannik misissuineq maannamut Kujataani nunaqarfinni pingasuni, Narsami, Maniitsumi, Sisimiuni kiisalu Nuummi ingerlanneqareerpoq. Maannalu Nuummi misissuinerit aappaat ingerlanneqarluni aallartinneqaqqammerpoq, ingerlassalluni piffissami 5. februaarimiit – 3. marsi 2018 ilanngullugu. Innuttaasut peqqissusiannik misissuineq Qeqqani Avannaanilu nunaqarfinni tallimani, kiisalu Qasigiannguani, Ilulissani, Upernavimmi, Aasianni aamma Qaqortumi ukiup ingerlanerani ingerlanneqassaaq. 

Paasissutissanik arlaqarnerusunik pissarsiniarluni attavigineqarsinnaavoq Ingelise Olesen, oqarasuaat +299558920, iole@uni.gl. Innuttaasut peqqissusiannik misissuit Facebookimi quppernerat aamma takuuk, uani: www.facebook.com/BFU2018