- “Qeqertami innuttaasut allagaqaataat attortissutigeqaara. Aatsaat siullerpaamik taamatut saaffiginnissummik tigusaqarpunga, tassani innuttaasut ataatsimoorlutik ikiaroornartup haship ajornartorsiutaanera annertooq qanoq iliuuseqarfigerusullugu allagaqarmata. Taamatut iliuuseqarusunneq nersortariaqarpoq nukissaqarnermillu angisuumik takutitsineruvoq. Taamaattumillu Qeqertamukarniarlunga aalajangerpunga tapersersuinera ikiuukkusunneralu takutinniarlugu,” taama oqarpoq Peqqissutsimut Naalakkersuisoq, Agathe Fontain.
Qeqertami innuttaasunik ataatsimiisitsinermi Agathe Fontain Ilulissani politiit peqatigalugit tikippoq. Innuttaasunik ataatsimiisitsinermut aggiasoqarluarpoq tassami nunaqarfinni innuttaasunit 110-iusunit 42-t peqataammata.
Ataatsimiinnermi Agathe Fontain Namminersorlutik Oqartussani hashi akiorniarlugu qanoq suliaqarnerlutik oqaluttuaraa, ilaatigut hashi akiorniarlugu nuna tamakkerlugu iliuusissatut pilersaarut eqqaaneqarluni kiisalu Allorfimmi innuttaasunut tamanut, pinngitsuuisinnaajunnaarnerminnik ikiortikkusuttunik, akeqanngitsumik katsorsaasalersimaneq eqqartorneqarluni.
- “Ataatsimoorluta inuiaqatigiinni hashimik atuilernissamut pitsaaliuisariaqarpugut, tamattalu tapersiinissatsinnut periarfissaqarpugut. Meerartavut mikisuuneraniit toqqissisimanermik pitsaasunik peqqinnartunillu ileqqoqalersikkutsigit, meeqqavut annertunerusumik peqqinnartumik inooriaaseqalernissaannik periarfississavagut taamalillutik inersimasunngorunik hashimik aanngajaarniutinillu allanik atuilernissamut akiuisinnaanngortillugit,” taama oqarpoq Agathe Fontain, nangillunilu.
- “Nalunngilarput sanngiinnerusunik ilaqutareeqartoq taamaattumillu akisussaaffimminnik qulakkeerinnissinnaanissaminnut annertunerusumik tapersersorneqarnissaminnut pisariaqartitsisunik. Uani pisortat iliuuseqartariaqarput ilaqutariillu ikorfartorlugit, minnerunngitsumik ilaqutariit aanngajaarniutit pillugit ajornartorsiuteqarpata.”
Innuttaasut pitsaaliuinissamut hashimullu ajornartorsiuteqarnermut tunngassuteqartunut sakkussaasinnaasunik ikiorneqarnissaminnillu ujartuipput. Oqaluttuarput nunaqarfimminni hashimik tuniniaaneq tamanut saqqumiinnartoq, piffissallu ingerlanerani piunera nipaatsumik akuersaaginnarneqarsimasoq.
Hashi pillugu qanoq unnerluutiginnissinnaanerluni taamaaliorniaraannilu uppernarsaateqarnissaq soqutigineqarluarpoq. Politiinit oqariartuut pingaaruteqarluinnartoq tassaavoq hashimik tuniniaasoqartillugu politiinut nalunaarutigineqarnissaq pingaaruteqartoq, taamaalilluni politiit nalunaaruteqarneq qisuariarfigisinnaammassuk.
Innuttaasut arlallit nunaqarfitsik nuannersoq uummaarikkaluartorlu maannakkut unittuusilernera ernummatigalugu oqariartuutigaat:
- “Nalunngilarput suliniutit pitsaasut, inigisat pitsaasut suliffeqarnerlu atornerluinermut pitsaaliuisinnaasut. Kisianni tassunga tunngatillugu neqeroorutini tamakkunani puigorneqartutut misigisimavugut. Misigaagut nunaqarfipput unittuueqqasoq,” innuttaasunik ataatsimiisitsinermi innuttaasut ilaat taama oqarpoq.
Qaasuitsup Kommuniani pitsaaliuinermut siunnersortit nalunaarput Qeqertaq piffissami aggersumi tikeraarfigineqarumaartoq.
Paasissutissat allat piniarneranni naalakkersuisumut allatsi Nauja Møller oqarasuaat +299 58 26 54-mut attavigineqarsinnaavoq.