Aqutsisoqarfik pisortartaarpoq
Atorfinitsitsinissamut ataatsimiititaliami tamanit isumaqataaffigineqartumik innersuussineq tunngavigalugu Peqqissutsimut Nunanillu Avannarlernik Suleqateqarnermut Naalakkersuisoqarfiup Malene Marie Nielsen peqqinnissaqarfimmi Peqqissutsimut Pitsaaliuinermullu aqutsisoqarfimmi pisortatut atorfinitsippaa.
Malene naatsorsuuserisutut ilinniarsimasoq qaammatini kingullerni tallimani Aqutsisoqarfimmi pisortaagallarsimavoq aqutsinerlu annertuumik misilittagaqarfigalugu. Malene Marie Nielsen ukiuni kingullerni sisamani peqqinnissaqarfimmi aningaasaqarnermut pisortatut atorfeqarpoq tamatumalu saniatigut ukiuni qulini naatsorsuuserinermi siunnersuinermilu suliffeqarfiup Deloitte-ip Nuummi, Københavnimi Slagelsimilu immikkoortuini aqutsinermik misilittagaqarluni.
Atorfittaaminut atatillugu naatsorsuutigisat pillugit Malene Marie Nielsen ima oqaarpoq:
-Peqqinnissaqarfimmi sulinera assut nuannaraara. Taamaammat suliffeqarfimmi siuttuunissara peqqinnissaqarfimmilu atugassarititaasunik inerisaaqqinnissami peqataanissaq- sulisorpassuit aqutsisorpassuillu peqatigalugit innuttaasoq qitiutillugu- peqqinnissaqarfiup peqqissumik imminullu napatittumik inerisarnerata nanginnissaa assut qilanaaraara.
Malene ukiut 14-it nunatsinniissimasoq marlunnik meeraqarpoq, Marius arfineq pingasunik ukiulik Augustilu arfinilinnik ukiulik. Malene, uia meeqqallu Nuummi najugaqarput.
Paasisaqarnerujumallutit naalakkersuisup allattaa Nauja Møller attavigiuk mobilikkut: +299 58 26 54 imaluunniit e-mailikkut: nmoe@nanoq.gl