- ”Assut ernumanarpoq tusarlugu atornerluineq angajoqqaat meeqqaminnut ingerlateqqittaraat. Tamanna tusaanngitsuusaaginnarsinnaanngilarput. Meeqqat angajoqqaallu pitsaanerusumik siunissaqalersikkumallugit ilaqutariit taamaattut akuliuffiginissaannut taamatullu pissusilersornerannik unitsitsinissamut sakkussanik pisariaqartitsivugut,” taama Peqqissutsimut Naalakkersuisoq Agathe Fontain, oqarpoq.

Innuttaasunik ataatsimiisitsinermi arlallit soqutiginnittut najuupput oqalliseqataallutillu. Kommunip illoqarfimmi pitsaaliuinermut ataatsimiisitaliaanit sinniisut arlallit innuttaasunik ataatsimiisitsinermi oqalliseqataalluarput. Taakkua oqariartuutaasa ilagaat Aasianni illoqarfinnilu ilinniarfeqarfinni ajornartorsiut iliuuseqarfigineqarnerusariaqartoq. 

Pitsaaliuinermut ataatsimiisitaliaq isumaqarpoq ikiaroornartoq ilikkarniarnermi sivisuumik ajornartorsiortitsilertarmat ilinniakkamillu naammassinninnissamut unamminiarnartorsiulersitsisarmat inuusuttut Aasiannukartartut ikiaroornartumillu pujortartarnermik ilinniartarnerat iluaqutaanngitsoq. Innuttaasunik ataatsimiisitsinermut aamma Ilaqutariinnermut Peqqissutsimullu Ataatsimiititaliamut ilaasortat sisamat kiisalu borgmesterinngortussaq, Ane Hansen, peqataapput.

- ”Ikiaroornartumik ajornartorsiut Inatsisartunit kommunalbestyrelsimillu pingaartinneqarnera assut nuannaarutigivara. Allannguissagutta innuttaasutut, suliffeqarfittut NGO-tut politikeritullu ataatsimoorluta sulisariaqarpugut,” taama Agathe Fontain, oqarpoq. 

Paasisaqarnerujumallutit Naalakkersuisup allattaa Nauja mobilikkut attavigisinnaavat +299 58 26 54.