Assi: Juaap Atuarfia

Najoqqutassiaq aalisakkanik salaatiliamut iffiugassamik qallerlugu iffiorfikkut uutassamut mamarunartumut ajugaassutaasoq, Kangersuatsiami Juaap Atuarfiani 8.- 9.klassimi atuartunit nassiunneqarpoq. Atuartut immikkuullarissumik tamatuminnga nerisassiassamut najoqqutassiornerat suliaminnillu peqqissaarussinerat dommerinik tupigusutsitsivoq.

Pitsaanerpaamut tulliuvoq Vigga Birch Larsen-ip pingasunik ukiullip Nuummeersup nerisassiassatut najoqqutassiaa: "aalisakkanik boorluliat kaariamik miseqqikkat". Pitsaanerpaat pingajuat ”Saarulliup nerpilerlugu pizzaliaq” Bianca Hansen Rødsgaard-ip qulinik ukiullip Qaqortumeersup najoqqutassiaraa. Akissarsisinneqartut taakku pingasut Peqqissutsimut Naalakkersuisoqarfiup pilluaqquai meeqqallu unammisitsinermi peqataasut allat tamaasa assut qutsavigalugit.

Ajugaasut pingasut taakku akissarsilluassapput. Pitsaanerpaatut toqqagaq angalanissamut uppernarsaammik aningaasanik nalilimmik pissarsissaaq, tullia pingajuallu aalisakkanik nerisassiassanik mamarunartunik Royal Greenland-imit aningaasaliiffigineqartunik akissarsissapput. Nerisassiassatut najoqqutassat akissarsissutaasut allanik ilallugit, meeqqanut atuakkiami aalisakkanik nerisassiornermut najoqqutassiami 2017-imi saqqummersussami ilaassapput.

Meeqqat namminneq aalisakkat atorlugit nerisassiassanut najoqqutassiornerat, nerisassiornermi peqataanissamut nerisassatullu aalisakkanik toqqaasarnissamut amerlanernik kajungilersitsissaaq.

” Nerisassiassanut najoqqutassiatut atuakkiap meeqqanik angajoqqaanillu isumassarsisitsisinnaanissaa neriuutigaara. Nerisassiornermi meeqqanik akuutitsinissaq amerlasuunik pitsaasunik patsiseqarpoq. Meeqqat nerisassiassanik peqqinnartunik attuisinnaanikkut mamassusaannillu misiliisinnaanikkut nerisassanut soqutiginninnerat ineriartussaaq, tamatumalu peqatigisaanik peqqinnartunik nerisaqarnissaq ilinniassavaat,” Peqqissutsimut Naalakkersuisoq Agathe Fontain oqarpoq.

Akulikitsunik aalisagartortarnissarput aalisakkanillu qallersuuteqartarnissarput Inuussutissat Timigissarnerlu pillugit Siunnersuisoqatigiit nerisat pillugit siunnersuutaasa qulit ilagaat. Aalisakkat orsunik peqqinnartunik D-vitaminimillu akoqarput, kalaaliminernullu uumasunut imarmiuneersunut allanut sanilliullugit mingutsitsinermit eqqugaannginnerullutik.

Nerisassiassatut pitsaanerpaamik najoqqutassiornermi unammisitsineq aalisakkanillu nerisassiat pillugit atuakkiaq saqqummersussaq, innuttaasut peqqisuunissaat pillugu suliniummi Inuuneritta II-mi 2016-imi, nerisat pillugit iliuuseqarnissaq malunnartinniarlugu suliniutaapput.

Paasissutissat sukumiinerusut Naalakkersuisup allattaa Nauja Møller oqarasuaatikkut: +299 58 26 54 imal. e-mailikkut: nmoe@nanoq.gl attaveqarluni pissarsiarineqarsinnaapput.

Assi: Juaap Atuarfia