Peqqinnissaq pillugu ataatsimeersuarnermit NUNA MED 2016-imit assit takukkit.

05-10-2016

Sap. ak. naanerani oktobarip ulluisa aallaqqaataanni, aappaanni- ataasingorneq ilanngullugu Nuummi peqqinnissaq pillugu ataatsimeersuartoqarpoq.
Nuna Med-qulequtsiullugu ataatsimeersuartarnerit 1991-imiilli ukiut marluk allortarlugit ingerlanneqartarput Peqqissutsimullu Naalakkersuisoq Doris Jakobsen tikilluaqqusisuuvoq.

Doris Jakobsen-ip peqqissuunissaq anguniarlugu iliuusissanik aalajangiinerni aallartitsinernilu ilisimatusarnerup pingaaruteqassusaa oqalugiaatimini erseqqissarpaa.
”Anguniagassatut siunniussatta angusinnaanissaannut eqqortumik tunaartaqarnitta paasiniarnerani, ilisimatusarnermi, innutaasut peqqissusaannut- aammali nalinginnaasumik nappaataasartunut peqqinnissaqarfiullu innuttaasunut neqeroorutaanut tunngatillugu paasisasi, iluaqutigisarpagut. Peqqissuunissamut pitsaaliuinermullu tunngatillugu suliniutit aallartitagut ilisimatusarnikkut paasisanik tunngaveqarnerat pingaartipparput”, Doris Jakobsen tikilluaqqusinermini taama oqarpoq.

Nuummi sap. akunnerata naanerani peqqinnissaq pillugu ataatsimeersuartitsinermit NUNA MED-imit assit takukkit. Ataatsimeersuarnermi 'Ineriartortitsinerup suleqatigiissutigineqarnissaa’-nik qulequtsikkami- ilaatigut Kalaallit Nunaanni pisuussutit uumassusillit pillugit Københavnip Universitetiani biologi Aviaaja Lyberth Haupmann oqalugiarpoq, nappaatit tuniluuttut pillugit ilisimatusartoq Grønlandsmedicinsk selskab-imilu siulittaasoq Anders Kock Kalaallit Nunaanni sakialluut TB pillugu oqalugiarpoq. Københavnip Universitetiani siutitigut, qinngakkut toqqusaakkullu nappaatinut ilisimatooq Preben Homøe, ukiut 25-it kalaallit akornanni siutit maqisarnerat pillugu ilisimatusarnermit paasisat pillugit saqqummiussivoq.

Kalaallit Nunaanni sukkorneq-, kræfti -, qarasaasiakkut nakorsiartitsisarnermut atatillugu Norgip Avannaani ukiuni 25-ni misilittakkat, Kalaallit Nunaanni innutaasut peqqissusaannik 1993-imiit 2014-imut misissuisitsinerit –nappaatit tuniluuttut akiuussutissiisarnerlu pillugit ilisimatusarnermut tunngasunik sammissaqartoqarportaaq.

Anders Koch ataatsimeersuarnermik NUNAMED-imik naggaasilluni oqaaseqarnermini International Circumpolar Health Conferencimut 2018-imi Københavnimi pisussamut Grønlands Medicinsk Selskabimiillu aaqqisuussamut qaaqqusivoq.

NUNAMED tulliani 2019-imi ingerlanneqassaaq.

Ataani assit takukkit.