Meeqqat Nuummi Dronning Ingridip Napparsimmavissuaniittut nakorsartinnermik-, nappaammut ersiutinik-, nappaammik-, misissortinnernik oqaluuserinninnermit allaasumik sammisaqarnissamut maanna periarfissinneqarput.

Nuummi Ladies Circle-imit aningaasaliissutaasimasut 100.000 koruunit atorlugit Nuum-mi meeqqanut issakatsiaarfilimmik, qeerlumiusaarfilimmik sisusarfilimmillu pinnguartarfiliortoqarpoq, tamatumalu saniatigut meeqqanut immikkoortortaqarfik pinngussanik oqorutinillu pissarsilluni. Pinnguartarfik juulip aallaqaataani naammassineqarpoq pisortatigoortumillu aggustip ulluisa 17-anni nal. 14.30-imiit 15.30-imut - Peqqissutsimut Naalakkersuisup Doris Jakobsen-ip allunaasamik kipisineragut - atoqqaartinneqassalluni.

-” Dronning Ingridip Napparsimmavissuani meeqqanut uninngasunut atugassariti-taasunik pitsanngorsaanissaq Naalakkersuisut suliniutigaat. Taamaammat pinnguartar-fittaap, meeqqanut Napparsimmavissuarmiittunut tamanut annertuumik nuannaarutaasussap, atoqqaartinnissaa qilanaaraara. Nuummi Ladies Circle aningaasaliinerat pitsaasoq pinnguartarfiliornissamik piviusunngortitsisoq pillugu qutsavigerusupparput” Peqqissutsimut Naalakkersuisoq Doris Jakobsen oqarpoq.

Pinnguarneq meeqqat peqqissusaannut inuunerissusaannullu pingaarutillit ilagimmassuk Dronning Ingridip Napparsimmavissuani sulisut pinnguartarfittaarneq pingaarteqaat ”Nuannaaqaagut. Arlaannik patsiseqartumik Dronning Ingridip Napparsimmavissuanut attuumassuteqarnermi aliikkutaqarniarluni allamukarfissaqarneq meeqqanut ilaqutaa-sunullu annertuumik pingaaruteqarpoq”, Aqutsisoqarfiup pisortaa Joanis Erik Køtlum oqarpoq. 

Paasissutissat sukumiinerusut uunga attaveqarnikkut pissarsiarineqarsinnaapput: 

Stine K. L. Bossen
AC-fuldmægtigi
Aqutsisoqarnermik Allatseqarfik / Ledelsessekretariatet
Oqarasuaat: (+299) 34 45 74
E-mail: stbo@peqqik.gl