Suleqatigiit Peqqissutsimut Naalakkersuisoqarfimmit, Nunatta Nakorsaaneqarfianit, Peqqinnissaqarfimmit, Statens Serum Institut, Dansk Lungeforening aammalu Nunarsuaq tamakkerlugu peqqinnissaq pillugu suliniaqatigiiffimmit WHO-meersuupput.

Peqqissutsimut Naalakkersuisoq Doris Jakobsen suliassaq aallartissimavaa WHO-lu tikeraarsarsimallugu. Oqarporlu:

-”Tuberkulose pillugu pissutsit imaannaanngillat. Tuberkulosertut suli amerlapput ajoraluartumillu ukiut kingulliit qulit kisitsisit annerusumik allanngorsimanngillat. Ukioq manna Tuberkulose pillugu aaqqissuineq qaangiuttussaavoq, pilersaarusiornissarlu tulliuttoq pillugu ilisimasallit innersuussutissaat pisariaqarput, ukiap ingerlanerani allattorneqarsimassallutillu. Qilanaarutigaara ilisimasallit qanoq innersuussuteqarumaarnersut.”

WHO aammalu TB pillugu ilisimasallit 2010-mi Kalaallit Nunaat tikeraarpaat. Tamatuma kingunerisimavaa TB pillugu akiuiniarnermi innersuussineq maannamut akiuiniarnermi tunngaviusut ukiuni 2012-2016. Maana naliliinissaq pisariaqarpoq maannamut suut pitsaasimanersut suullu pitsanngorsagassaanersut.

Suleqatigiit tikeraassavaat Tasiilaq, Kulusuk, Nuuk aammalu Aappaluttup eqqaani Rubinisiorfik. Soqutiginnittut suleqatigiit malinnaaffigisinnaavaat Twitter aamma Facebook aqqutigalugu WHO ullut tamaasa suliatik saqqummersittalerpatigit.

Tuberkulose nappaataavoq tuberkelbakteriamik taaneqartumik peqquteqartumik tuniluuttartoq. Nappaat antibiotikanik assigiinngitsunik katsorsarneqarsinnaavoq. Tuberkulose pillugu annerusumik atuagaqarsinnaavutit uani www.peqqik.gl


Paasissutissanik annerusunik piniaruit attavigisinnaavat Nunatta Nakorsaaneqarfiani peqqissaaneq pillugu siunnersorti Rikke Bruun de Neergaard oqarasuaatikkut: +299 34 51 89 imaluunniit e-mail: rbdn@nanoq.gl. aqqutigalugu.