Piffissami sivisujaami Nuummi innuttaasut Dronning Ingridip Peqqissaavianut oqarasuaatikkut nakorsamut attaveqarniarnerup ajornartorsiutitaqarnera misigaat.

Ullut tamakkiallugit innuttaasut 120-it nakorsamut oqarasuarnikkut kiffartuunneqartaraluit, ilaatigut innuttaasut qulit 15-illu akornanniittut anngutinngitsoortarput. Innuttaasut iluatitsinngitsoortut taakku utaqisunit peerneqariasaartarput aqaguanilu misileeqqittariaqarajuttarlutik. Taamanna pitsaanerusinnaavoq taamalu misigisunut ajuusaarpugut!

Peqqinnissaqarfik TELE suleqatigalugu tamatumunnga nasuiaataasinnaasumik paasiniaagaluarput. Sap. ak. tulliuttut marluk ingerlaneranni ajornartorsiutaasut arlallit nassuiaatissarsisinnaanissaat naatsorsuutigaarput taamaammallu piffissami qanittumi ajornartorsiutip anigorneqarnissaanut qanillattornissaq neriuutigaarput.

Dronning Ingridip Peqqissaavianut nalinginnaasumik attaveqarneq

• Nalinginnaasumik piffissamik inniminniiniarnermi nakorsamut oqarasuaatip normua 801111 atorneqassaaq
• Pinasuartumik ikiorsiiffigisarialimmik nappaateqalersimaguit, Dronning Ingridip Peqqissaavianut oqarasuaatikkut: 344000 saaffiginnissinnaavutit
• Ajutoornerni inuunermullu navianaatilimmik napparsimanermi oqarasuaatikkut uunga saaffiginnittoqassaaq 344 112
• Apeqqutit nalinginnaasut nakorsaatinillu nunguutilernermi qarasaasiakkut nakorsamut attaveqaat atorneqarsinnaasoq tassaavoq: www.doktor.gl

Peqinnissaqarfimmi qullersat sinnerlugit
Aqutsisoqarfiup pisortaa Jóanis Erik Køtlum