-”Innuttaasunik misissuinerup innuttaasuni peqqissutsip ineriartornerat takutippaa, aamma peqqinnitsinnut naleqqiullugu sumi annerpaanik unamminartoqarnersoq akissuteqarfigalugu. Peqqinnissamut tunngasuni suliniutit siunnerfilersulerutsigit pingaarnersiulerlugillu ilisimasaq taanna pisariaqartissavarput, taamaattumillu innuttaasut peqqissuunerat pitsaanerulersinniarlugu Naalakkersuisut ilungersuuteqarnerannut naleqqiullugu innuttaasunik misissuineq sakkussani pingaaruteqarluinnarluni,” taamatut oqarpoq Peqqissutsimut Attaveqarnermullu Naalakkersuisoq, Steen Lynge, nangillunilu:

-”Misissuinermi peqataaqqullugit qaaqqusissummik tigusaqarsimasut tamaasa neqeroorummut akuerseqqullugit kaammattorusuppakka. Illit peqataanerit pingaarpoq, maannakkut aamma siunissami kinguaariissanut naleqqiullugu.”

Innuttaasunik misissuineq siusinnerusukkut 1993-1994-mi, 1999-2001-mi aamma 2005-20010-mi ingerlanneqarsimavoq. Maannakkut misissuinermi peqataasussatut naatsorsuutigisat 2600-it amerlanersaat aamma siusinnerusukkut misissuinerni peqataasimapput. Taamaalilluni peqqinnissakkut, napparsimasarnerit aamma inuunermi atukkat ineriartornerannik paasisaqarnissaq uppernarsaanissarlu aamma innuttaasut peqqissuunissaannik suliniut Inuuneritta sioqqullugu kingornalu innuttaasut peqqissuunerannik takutitsinissaq ajornassanngilaq.

Misissuineq inunnik apersuinernik, apersuinermi nammineq immersukkanik aamma katsorsaanermut tunngasunik misissuinernik assigiinngitsunik tunngaveqassaaq, soorlu aap naqitsineranik aamma orsup procentianik uuttuinerit. Ilai aamma aaversissapput. Peqataasut ilaatigut ukununnga naleqqiullugu ileqquminnik aperineqassapput: imigassaq, pujortarneq, timikkut aalaneq, nerisat aamma peqqinnissaqarfik naammagineraat.

Misissuinermut atasumik toqussutaasunik nalunaarsuiffimmi, kræfteqartunik nalunaarsuiffimmi aamma napparsimasut nuna tamakkerlugu nalunaarsuiffianni peqataasut tamarmik nalunaarsorneqarsimaneri malinnaavigineqassapput.

Innuttaasut peqqissuunerannik misissuineq Nuummi aallartissaaq, ukiullu ingerlanerani ilisimatusartut nunap immikkoortuini tamani illoqarfinnut nunaqarfinnullu tikeraassallutik. Misissuineq pillugu nalunaarusiaq siulleq naatsorsuutigineqarpoq 2015-mi saqqummersinneqassasoq.

Innuttaasunik misissuineq Peqqissutsimut Attaveqarnermullu Naalakkersuisoqarfimmit aningaasalersorneqassaaq. Innuttaasunik misissuineq pillugu peqqinnissaq pillugu nittartakkamiwww.peqqik.gl-imi annertunerusumik atuagaqarsinnaavutit.

 
Annertunerusunik paasisaqarnissamut immikkoortortami pisortaq Julie Præst Wilche oqarasuaat +299 346625-mi imaluunniit e-mail jprw@nanoq.gl -imi imaluunniit professor Peter Bjerregaard oqarasuaat +45 40127585 imaluunniit e-mail pebj@nanoq.gl -imiattavigineqarsinnaapput.