-”Isumaqarpunga politiit imminut toquttoqartarneranik pinaveersaartitsinermut atatillugu suleqatigiinnerunissamik ujarlernerminni, ilumoorluinnartumik oqariartuuteqartut. Politiit pinaveersaartitsinermut atatillugu peqataanissamut piumassutsimik ersersitsinerat nuannaarutissaavoq. Nunatsinni imminut toquttut imminullu toqunniarlutik sioorasaarisut ikilisissagutsigik, allatut ajornartumik suleqatigiittariaqarpugut,” Peqqissutsimut Nunanillu Avannarlernik Suleqateqarnermut Naalakkersuisoq Doris Jakobsen oqarpoq, imalu nangilluni:

-”Suleqatigiinnerup pitsaanerusup pilersinnissaanut siuttoorusuppunga. Isumaliutiga tigussaasumik tassaavoq pinaveersaartitsinermut atatillugu suleqatigiinnermi siunnersuisoqatigiinnik ilaatigut politiit-, peqqinnissaqarfiup inunnillu isumaginnittoqarfiup akornanni, suleqatigiinnermut maleruagassiuussamut toqqammaviusinnaasumik pilersitsinissaq.”

- ”Imminut toquttoqartarneranik pinaveersaartitsinermi suut iluaqutaasarnerat pillugu ilisimasaqarnerunissamik pisariaqartitsivugut. Nunat issittut akimorlugit suliniummit, nunani issittuni inuusuttut akornanni imminut toquttoqartarneranik pinaveersaartitsinermi, suut iluaqutaanerinik sammisaqarsimasut misilittagaasa pissarsiffiginissaat, immikkut ittumik qilanaaraarput. Ilisimasat taamaattut siornatigut pissarsiarisinnaasimanngilagut paasisallu taakku siunnerfilimmik pinaveersaartitsinissamut tunngavissiilluassapput”, Doris Jakobsen oqarpoq.

PAARISA-p massakkut inuit anigoruminaatsitaminnik nalaataqarnerminnik erloqissuteqartut ingerlariaqqinnissaat anguniarlugu, paasiniaaviginissaannut-, iliuuseqarfiginissaannut-, ikiorsiinissamullu sakkussaqartinnissaat qitiutillugu nuna tamakkerlugu inunnik suliamut tamatumunnga atatillugu pingaarutilimmik inissisimasunik, pikkorissaanermik inerisaavoq. Suliamut tamatumunnga atatillugu PAARISA kommunini pinaveersaartitsinermut siunnersortinik oqaloqateqarpoq.

Pikkorissaaneq, Peqqissutsimut Naalakkersuisoqarfiup Ilisimatusarfik suleqatigalugu- nuna tamakkerlugu, sanngisuunermik qulequtserlugu suliniutaanut, tapiliunneqassaaq. Sanngisuunermik qulequtserlugu suliniuteqarnerup siunertaraa atuartut aaqqiagiinnginnernut unammilligassanullu iliuuseqarfiginnissinnaanerunissaannut sakkussinnissaat – allamik periarfissaarulluni imminut toqunnissap periarfissatuaalinnginnissaa.

Imminut toquttoqartarneranik pinaveersaartitsinermut atatillugu suliniut ”2013-imiit 2019-imut imminut toquttoqartarneranik pinaveersaartitsinermut atatillugu suliniut” nassuiaatigineqartoq nittartakkami Peqqik.gl-imi atuarneqarsinnaavoq.

Paasissutissat sukumiinerusut Naalakkersuisup allattaa Lea Holm oqarasuaatikkut +299 346605, qarasaasiakkut leah@nanoq.gl attavigalugu, Peqqissutsimut Nunanillu Avannarlernik Suleqateqarnermut Naalakkersuisoq Doris Jakobsen-imit pissarsiarineqarsinnaapput.