Post Doc. Steven Arnfjord-imut akissut, Sermitsiaq.ag-mi ”Nuna tamakkerlugu akeqanngitsumik atornerluisunik katsorsaasalernissamut siunnersuut” allataanut:
Allattoq, Martha Lund Olsen, Peqqissutsimut Naalakkersuisoq.
Asasara Post Doc. Steven Arnfjord
Atornerluisunik katsorsaanissamik pilersaarut – inuttut atukkat kingornussat qitiutittariallittaaq ilanngullugit tamakkiisumik isiginnilluni iliuuseqarneruvoq.
Naalakkersuisut pilersaarutaat ”Nuna tamakkerlugu akeqanngitsumik atornerluisunik katsorsaasalernissamut siunnersuut” post doc. Steven Arnfjord-ip isumaa naapertorlugu inuttut atukkat qitiutinneqarpallaaratik atornerluisup avatangiisaasa qaninnerit allanngortinnissaat suliffissanillu pilersitsinissaq qitiutinneqartariaqarput.
Naalakkersuisoq Martha Lund Olsen tamatumunnga ima oqaaseqarpoq: ” atornerluisunik katsorsaaneq iliuuseriniakkat tamarmik ataqatigiissinnerisigut aatsaat sunniuteqassasoq isumaqatigilluinnarpara– atornerluisunik katsorsaanissamik pilersaarutitsinni aamma taamaappoq. Isumaga naapertorlugu isornartorsiuineq siunertaminut naapertuutinngilaq”.
Imalu nangippoq: ”Atornerluisut tamarmik katsorsartinnissamik neqeroorfigineqassapput. Ajoraluartumik atornerluisut tamarmik katsorsartinnissamut periarfissaqarsimanngillat– tamanna atorsinnaanngilaq. Atornerluisut ilaannaasa katsorsarneqarsinnaanerat allalli neqeroorfigineqarsinnaannginnerat ingerlaannarsinnaanngilaq. Pisariaqartitsineq naapertorlugu katsorsaasoqassaaq”.
”Atornerluisummi ilaquttani ulluinnarnilu inuunini qimannagit katsorsarneqarsinnaaqqullugu katsorsaaneq sapinngisamik najukkami ingerlanneqassaaq. Tamanna ilaquttat ulluinnarnilu qanimut attavigisartakkat akuutillugit neqerooruteqarnissamut periarfissiivoq– tamannarpiarlumi anguniagaraarput”.
Pilersaarummilumi katsorsaanerinnaap ingerlanneqarsinnaannginnera immikkut erseqqissaatigineqarpoq. Katsorsartittussat katsorsartilinnginnerminni inuunermut tunngasunik allanik soorlu suliffimmut, ilinniagaqarnermut, inuttut atukkanut, peqqissutsimut, ilaqutariinnermut-, meeqqanut aammataarli paquminarsinnaasunut soorlu pinerlunnernut tunngasunik aamma apersorneqartarput. Atornerluisup pisariaqartitsinera naapertorlugu tamakkiisumik isiginnilluni iliuuseqarsinnaanissaq tamatumani siunertaavoq.
Najukkami kommuni suleqatigalugu katsorsartereernerup kingorna ikorfartorneqarnissaq pilersaarusiorneqassaaq. Katsorsaanermi angusat piuinnartinneqassappata katsorsartereernermi pitsaasumik inuuneqarnissaq katsorsartinnerlu naammassippat qanoq pisoqarnissaanut ersarissumik pilersaarusiortoqarnissaa pisariaqarpoq.
Imalu naggasiivoq: ” Suliffeqaraanni ineqaraannilu atornerluisuunnginnissap ajornannginnerunera isumaqatigilluinnarpara. Tamanna qularutissaanngilaq, arlaanniilli aallartiffeqartariaqarpugut – pitsaasumillu katsorsartinnissamik neqerooruteqarneq aallartiffissaavoq pitsaasoq. Pilersaarummi inuttut atukkat kingornuttakkat qitiutinneqarpallaarnerannik oqalunneq eqqunngilluinnarpoq”.
Ilaqutariit naartusortallit 25 %-ii pallillugit immikkut ittumik tapersersorneqarnissamik pisariaqartitsinerat, meeqqat amerlasuut angerlarsimaffimmi atornerluiffiusumi peroriartortut sumiginnagaanerat kinguaassiuutitigullu innarlerneqarnerup, tarnikkut nappaateqarneruptt, imminut toquttarnerup atornerluinerullu imminnut ataqatigiinnerat ilisimavarput. Taamaattoqarnera isiginngitsuusaarsinnaanngilarput iliuuseqarfigisariaqarlugulu. Atornerluinikkut ilaqutariit tamarmik sunnerneqartarput. Ilaqutariinnik peqqissunik pilersitsinikkut aatsaat inuttut atukkatigut kingornuttakkat kipitissinnaavagut. Atornerluisoq ilaqutaalu ilanngullugit katsorsaaneq aallartiffissaavoq pitsaasoq – tamannalu pilertortumik aallartinneqartariaqarpoq.
Atornerluisunik katsorsaaneq suliffinnik pilersitsinissamut suliffeqarfinniillu anisitaannginnissaq anguniarlugu Naalakkersuisut ataatsimut iliuusissatut pilersaarutaannut ilaavoq. Amerlanerusummi suliffeqalernerisigut imminnullu pilersorsinnaalernerisigut atorfissaqartitatta allat akissaqartilernissaannut periarfissaqalissaagut.
Aamma takuuk