Corona pissutigalugu sapaatip akunnerani 18-imi pisussaagaluit kingusinnerusukkut pisussanngorlugit kinguartinneqartut pillugit Naalakkersuisut 6. april tusagassiortunut nalunaaruteqarput.

Nuna tamakkerlugu inassutit allanngortinneqarnerat pissutigalugu sapaatip akunnerani 18-imi pisussat ullumikkornit ullunilu tullinnguuttuni piviusunngortinneqarsinnaalerput.

Ukioq manna sapaatip akunnerani 18-imi oqariartuutigineqarpoq: » Kattulluta inuunerinneq ilusilersorparput «. Meeqqat inuusuttullu pitsaanerusumik inuuneqalernissaannut tamatta ataatsimoorussamik akisussaaffeqarnitsinnut tapersersuisuunitsinnik oqariartuut Paarisap siaruartikkusuppaa. Kikkut tamarmik sapinngisaminnik sumiiffigisaminnilu tapersersuippata ataatsimoorluta inersimasut akisussaassuseqartut pitsaanerusumik inuuneqalersitsisut ataqatigiissarsinnaavavut.

Sapaatip akunnerani 18-imi aningaasanut qinnuteqarfissaq kinguartinneqartoq 1. juni 2020-imut suli atuuppoq. Aningaasat qinnutigineqartut 1. Juni 2020 kingorna tunniunneqarumaarput.

Paasissutissanik allanik pisariaqartitsisoqarpat peqqissutsimut tunngasunut siunnersorti Lone Steenholdt-Guttesen uunga attavigineqassaaq: +299 34 67 44 imaluunniit e-mail: lons@nanoq.gl