- Ilaatigut pitsaaluinermut siunnersortinit, peqatigiiffinnit, sunngiffimmi paaqqinnittarfinnit aamma nammineq kajumissutsimik suliaqartunit Inuunerittap Aningaasaateqarfianut qinnuteqaaterpassuit tigusatta ersersippaat nunarput peqqinnerulersinniarlugu piumassuseqarlutillu aallussilluartut amerlasoorujussuusut. Ukioq manna suliniutit taperserneqartut inunnut amerlasuunut najukkamilu peqqissutsimut iluaqutaassapput. Tamanna nuannerpoq, ataatsimoornermimi peqqissuseq ilorrisimaarnerlu tamatsinnut iluaqutaasut pilersittaratsigit,” taama oqarpoq Peqqissutsimut Naalakkersuisoq, Martha Abelsen.

Suliniutit meeqqanut, inuusuttunut aamma ilaqutariinnut tunngasut ukioq manna salliunneqarput. Pingaartumik suliniutinut kinguaassiuutitigut peqqissutsimut tunngasunut aamma imigassamik, ikiaroornartumik naamaarnermillu pitsaaliuinermik ukkartarinnittunut tamanna atuuppoq. Ukioq manna suliniutit ilaat Inuunerittap Aningaasaateqarfianit taperserneqartut makkuupput:

• Suliniut Aalanerusa, Sisimiuni KTI-mi kolligiep isumagisaa. Suliniummi tamatumani inuusuttut kolligiemi najugallit timiminnik aalatitsinerulerniassammata silami sammisassanik neqeroorfiginissaat siunertaavoq. Aningaasanik sikkilinik qaqqakkoorutinut atugassanut qinnuteqarput.
 
• Kangaatsiami pigisaanilu pujortartarnermik pitsaaliuineq. Suliniummi ukkatarineqarput angajoqqaat, aanaakkut, inuusuttut aamma meeqqat.

• Qaqortumi aalanermik sammisaqarneq, juunimi meeqqat 6-niit 15-nit tungaanut ukiulinnut timersornikkut aaqqissuunneqartoq.  

• Tasiusami aamma Aasianni meeqqanut, inuusuttunut aamma ilaqutariinnut ujakkaarutit.

Tulliani Inuunerittap Aningaasaateqarfianut qinnuteqarfissap kingulleq tassaavoq 1. april 2020. Inuunerittap Aningaasaateqarfia pillugu www.peqqik.gl-imi atuarnerusinnaavutit.


Paasisaqarnerujumallutit attavigiuk naalakkersuisup allattaa Inger Heilmann Larsen oqarasuaatikkut: +299 55 41 60 imaluunniit e-mailikkut: ihla@nanoq.gl