Immikkoortortaqarfik nutaaq katiteriffiusoq PAARISA-mik ateqarluni sulissaaq Isumaginninnermut Aqutsisoqarfimmullu ilaalissalluni. Pitsaaliuinerup pingaartinneqarnera erseqqissarniarlugu Isumaginninnermut Aqutsisoqarfik nutaamik taaguteqalissaaq tassaasoq: Pitsaaliuinermut Isumaginninnermullu Aqutsisoqarfik – Styrelsen for Forebyggelse og Sociale forhold.

Pitsaaliuinermut immikkoortortaqarfiup suliniutit ingerlanneqartut ataqatigiissassavai, suliniutillu oqartussaasoqarfiit assigiinngitsunik suliallit akornanni suliniutigineqartut aqqutigalugit kommunit suleqatigineqarneri immikkut ittumik patajaallisassallugit.

- Isumaginninnermut peqqissutsimullu suliassaqarfinni unammilligassat annertuut immikkoortortaqarfimmik ataatsimoortitamik pilersitsinerinnakkut aaqqiivigineqarnavianngitsut Naalakkersuisut erseqqissaatigissavaat. Inuiaqatigiinni pitsaasumik ineriartortitsinissamut ataatsimut akisussaaffeqarnerput immikkoortortaqarfiup ikorfartussavaa, Peqqissutsimut, Isumaginninnermut Inatsisinillu atuutsitsinermut Naalakkersuisoq Martha Abelsen oqarpoq nangillunilu:

- Toraagalimmik ataqatigiissaagaasumillu suliniuteqarnikkut meerartatsinnut, inuusuttatsinnut ilaqutariinnullu iliuuseqarnerusinnaasugut qularinngilluinnarpara. Atugarissaarnissamik inuunermilu nalilinnik pilersitsiniarnermik suliaqarneq pillugu Namminersorlutik Oqartussat, kommunit inuillu nalinginnaasut akornatsinni tamanna ataatsimoorluta pigipput pingaaruteqarluinnarpoq erseqqissaavigissallugu, pitsaaliuinermillu immikkoortortaqarfiup nutaap tamanna peqataaffigissavaa.

PAARISA nutaaq 1. marts 2019 pilersinneqarpoq.


Annertunerusumik paasiniaasoqarsinnaavoq uunga attaveqarluni: Naalakkersuisup Allattaa Inger H. Larsen: +299 55 41 60 imaluunniit e-mail: ihla@nanoq.gl