- “Inuiaqatigiinni hashimik atornerluineq qanoq pitsaanerpaamik pitsaaliorneqarsinnaasoq pillugu maannakkorpiaq oqallinnermut atatillugu ‘Hashi akiorniarlugu nuna tamakkerlugu pilersaarut’-ip isiginiarneqarluni sammineqarnissaa kissaatigaara, taannami hashimik atornerluinermik pitsaaliuinermik suliaqarnermi tunngaviulluinnarmat,” taama Peqqissutsimut Naalakkersuisoq Agathe Fontain oqarpoq.

- “Naalakkersuisut ‘Hashi akiorniarlugu nuna tamakkerlugu iliuusissatut pilersaarut’, naalakkersuisooqatigiit siuliinit 2016-imi upernaakkut ataatsimiinnermi saqqummiunneqartoq, suliniuteqarfigalugu ingerlatiinnarpaat. 
Iliuusissatut pilersaarut susassaqarfiit akimorlugit ingerlanneqarpoq, tassami hashi pitsaaliorneqassappat pinngitsoorata immikkoortortaqarfiit akimorlugit suleqatigiittariaqarpugut,” Agathe Fontain taama oqarpoq nangillunilu:

- “Hashimik pitsaaliuineq inuiaqatigiit suliassaraat. Taamaattumik suliffeqarfinniit innuttaasunilluunniit haship atugaanerata pitsaaliorneqarnissaanut isumassarsianik pissarsinissannut ammalluinnarlungalu tiguserusoqaanga.”

“Hashi akiorniarlugu nuna tamakkerlugu iliuusissatut pilersaarut”-mi suliniuteqarfigineqartut arlallit allaaserineqarput, taakkulu tamakkerlutik hashimik atornerluinerup pitsaaliorneqarneranut iluaqutaasumik ilapittuutaassapput. Iliuusissat ilaat peqqinnissaqarfiup ataani inissisimapput, allat ilinniartitaanerup ataaniillutik kiisalu allat aningaasaqarnerup inatsiseqarnerullu ataaniillutik. 

- “Peqqinnissaqarfimmit suliniutit atornerluinermut tunngasunik suliniutinut maannakkut ingerlanneqartunut aammalu imigassamut tunngasumik iliuusissatut pilersaarummut attuumassuteqarput. Iliuusissatut pilersaarummi Naalakkersuisut innuttaasut peqqissusaat pillugu Inuuneritta II-mi ataatsimut periusissiaat anguniagaallu tunngavigineqarput. Taamaattumik iliuusissatut pilersaarummi pitsaaliuineq immikkut ittumik meeqqanut inuusuttunullu sammitinneqarpoq,” taama Peqqissutsimut  Naalakkersuisoq Agathe Fontain oqarpoq.

“Hashi akiorniarlugu nuna tamakkerlugu iliuusissatut pilersaarut”-mi iliuusissatut pilersaarutaasut ilaat aallartinneqareerput iliuusissatulli pilersaarutaasut ilaat suli aningaasaliiffigineqanngillat.

“Hashi akiorniarlugu nuna tamakkerlugu iliuusissatut pilersaarut” Peqqik.gl-imi atuarneqarsinnaavoq.