Dronning Ingridip Napparsimmavissuani meeqqanut uninngasunut atugassiissutit
Sermitsiap nittartagaani allaatigisami meeqqat illersuisuata Dronning Ingridip Napparsimmavissuani meeqqanut uninngasunut tunngatillugu pissutsit pitsaanerulersinneqarnissaat piumasaraa. Peqqinnissaqarfimmi qullersaasut nakorsartittunut immikkoortortaqarfimmi pisortat peqatigalugit- siunissaq qaninnerusoq ungasinnerusorlu eqqarsaatigalugit- pissutsinut pitsannguutissat pillugit nassuiaateqarpoq.
Meeqqanut tunngatillugu periarfissat pitsaanerusinnaanerat nassuerutigaarput. Meeqqat illersuisuata uparuaanerasut nakorsartittunut immikkoortortaqarfimmi meeqqat inersimasullu avissaartinnerusinnaanissaat kissaatiginarpoq. Ullumikkut meeqqanut immikkoortortami inersimasut immikkoortuanut atassuteqartumi, siniffiit meeqqanut uninngavissat arfineq pingasuupput.
Meeqqanut uninngaviup inersimasut uninngaviannut atassuteqarnerata, meeqqat inersimasullu uninngavissaasa eqaatsumik ikilillugillu amerlineqarsinnaasarnerat iluaqutitaraa.
Taamaattoqarnera meeqqanut inersimasunulluunniit napparsimasunut pitsaanerpaatut oqaatigineqarsinnaanngilaq, maannamulli periarfissaagallartut tunngavigalugit immikkoortitsivinnissaq, meeqqat inersimasullu nakorsartittarialimmik nappaatillit, misissortinnissamut nakorsartinnissamullu sivisunerusumik utaqqisariaqarnissaannik kinguneqassaaq.
Peqqissutsimut Pitsaaliuinermullu Aqutsisoqarfimmi pisortaq Jóanis Erik Køtlum ima nassuiaavoq:
-Siunissaq qaninnerusoq eqqarsaatigalugu sapinngisarput tamaat meeqqat uninngavianni inersimasunik uninngasoqarnissaa pinaveersaagaraarput. Maannamut inissaqarnikkut sulisoqarnikkullu periarfissap iluani pitsannguutaasinnaasunik immikkut ittunik iliuuseqarsinnaaneq misissorparput. Nakorsartittunut immikkoortortami sulisut meeqqat pitsaasumik pineqarlutillu atugaqartinneqarnissaat anguniarlugu annertuumik suliniuteqartuupput.
Siunissaq ungasinnerusoq isigalugu, Dronning Ingridip Napparsimmavissuata allilerneqarnerata, pilersaarutit malillugit naammassineqarnissaanut, sanaartornermut aningaasalliissutinik pissarsinissaq tullinnguuppoq. Dronning Ingridip Napparsimmavissuata allilerneqarnerani amigaataalersut tassaapput nakorsartittunut tarnimikkullu nappaatilinnut immikkoortortat.
Inersimasut nakorsartittariallit aamma isumagisussaagatsigik, suliassaq imaannaanngitsuuvoq. Mianersorluni ingerlasariaqarpoq oqaatigeriikkatsitullu napparsimasut allat ajornerusumik atugassinngikkaluarlugit, meeqqanut atugassarititaasut pitsanngortinniarlugit suliniuteqarpugut.
Peqqinnissaqarfimmi qullersat sinnerlugit
Aqutsisoqarfiup pisortaa Jóanis Erik Køtlum
Paasissutissat
Paasissutissat sukumiinerusut Aqutsisoqarfiup pisortaa Jóanis Erik Køtlum oqarasuaatikkut: 34 43 93 attavigalugu pissarsiarineqarsinnaapput.
Una toorlugu MIO –mik ilanngussaq takusinnaavat