Siffissakkut seeqqukkullu pilattaanissamut agguaqatigiissillugu utaqqineq assersuutigalugu 2010-ip kingorna affaannanngortinneqarsimavoq.

Nungullarsimasumik siffiaqarneq imaluunniit nungullarsimasumik seeqqoqarneq annernarpoq. Isip iluatigut naqitsineqarpallaarneq pissutigalugu takusaqarpiarsinnaanani inuuneq ajornakusoorpoq. Taamaattumik nappaatinut taakkununnga nalinginnaanerpaanut pilatsinneqarnissamut utaqqisarnerup sivikillisinneqarnera nutaarsiassaavoq nuannersoq.

2010-mi inuit nungullarsimasumik siffiallit siffiaq taarsertinniarlugu agguaqatigiissillugu ukiuni pingasuni utaqqisariaqartarsimapput. Ullumikkut utaqqisarneq qaammatinut 16-inut sivikillisinneqarpoq, aamma taamaappoq seeqqukkut pilatsinniartunut. Isip iluatigut naqitsineqarpallaarnermut isitigullu ajoqutinut allanut pilatsinnissamut utaqqineq aamma malunnaatilimmik sivikillisinneqarpoq. Ukioq kingulleq aatsaat taamak sivisutigisumik utaqqisoqartarpoq qaammatini 20-ni agguaqatigiissillugu utaqqisoqarsimalluni.  Immikkoortumulli pilersaarusiornermullu amerlanernik aningaasaliisoqarneratigut utaqqisarneq ukiup affaanik sivikillisinneqarpoq. Inunnut immaqa takusaqarpiarsinnaanngitsunut ukiup affaa sivisusinnaavoq. Minnerunngitsumik isikkut pilatsinneq amerlasuutigut isigisaqarsinnaaneq malunnaatilimmik pitsaaninngortinneqarsinnaappat. Pissutsit nalinginnaasuupput. Kisitsisit nutaat takutippaat katsorsaanernut amerlanernut utaqqinerit ukiumik ataatsimik imaluunniit ukioq ataaseq inorlugu sivikillisinneqarsimasut. Nappaatiminnillu katsorsartinnissaminnut sivisunerpaamik utaqqisut ukioq ataaseq affarlu utaqqisarlutik.

Politikkikkut toqqaaneq
Steen Lyngep, Peqqissutsimut Attaveqarnermullu Naalakkersuisup, ineriartorneq nuannaarutigilluinnarpaa:
- Sivisuumik utaqqisarnerup qaangerneqarnissaa kissaatigisimavarput tamatumunngalu aningaasaliisimalluta. Ilungersuuteqarsimanerit maannakkut ajunngitsumik kinguneqalerput.
- Inuit taakku qutsappakka, maannakkut nappaatiminnut sukkanerusumik katsorsarneqarsinnaalermata anniaateqarunnaarlutik, kingumullu pitsaasumik peqataallutillu inuusinnaalissammata.
Politikkikkut anguniagaq tassaavoq katsorsaanernut tamanut utaqqisarnerup agguaqatigiissillugu ukiumut ataatsimut appartinneqarnissaa.

Utaqqineq akeqarpoq
Utaqqineq ataasiakkaanut akornutaavoq inuunermi nalit ajornerulersimmagit, kisianni aamma piffissami sivisuumi napparsimanerit pisortallu pilersuisuuneranni aningaasartuutit qaffanneri pissutigalugit inuiaqatigiinnut aamma akisuujulluni.
Ajoraluartumilli paasineqarpoq katsorsaasarnerni ataasiakkaani utaqqisarnerit kingumut sivitsoqqilersut – naak amerlanernik aningaasaliisoqaraluartoq piginnaasallu annertusineqaraluartut. Tamatumunnga pissutaavoq amerlanerusut katsorsartikkusunnerat. Immaqa sivisuumik utaqqisoqannginnissaa tusaamaneqalermat. Aammattaaq amerlanerusugut sivisunerusumik inuusalerpugut utoqqalillutalu, taamaattumillu amerlanerusut nappaatinut amerlanerusunut katsorsartinnissaminnut atorfissaqartitsillutik.

Paasisaqarnerorusukkuit, saaffigiuk:
Nakorsaaneq Anne Marie Ulrik
E-mail: amu@peqqik.gl
Oqarasuaat (+ 299) 34 40 00