PAASISSUTISSAT

Pujortartarneq peqqissutsinnut akornutaanerpaasut ilagaat timinnillu navianartorsiortitsinerpaat ilagalugu. Naak inuusukkaluarlutit pujortartarnerup isikkut sunnissavaa, imaassinnaavorlu ammit qasikuluttunngorlunilu isikkuminarunnaartoq, kigutitit sungaartissapput, nutsatit atisatillu tupasunnilerlutik. Tamakkua saniatigut pujortartarnerup kingunerisinnaavaa navianartorsiortitsisumik nappaateqalernerit, inuunerpit naleqassusaa appartoq, toqujaarpallaartutillu. Cigarettit tamarmik inuuninni minuttinik 14-inik naleqarput.
Inuusuttuaraatillutit pujortartaleruit pujortartartunit utoqqaanerusunit tupamik atuinerunissat ilimanarluinnarpoq. Tamatuma saniatigut nikotinimik pinngitsuuisinnaajunnaarnissannik, taamaalillutillu unitsitsinissavit ajornakusoorneruneranik kinguneqartarpoq.
Nikotinip qaratsat sunnertarpaa, pingaartumik inuusuttuuguit. Qaratsat suli inerilluarsimanngimmat inuusuttuaraatillutit pujortartalernikkut cellit timip sananeqaatai iluarsineqarsinnaanngitsumik akornuserneqarsinnaapput. Pujortartaliaarneq ajoqusernerup annertuneruneranik kinguneqartarpoq, eqqaamallaqqigunnaarnerunermillu kinguneqartarluni. Ilisimatusarnerup ilaatigut takutippaa 18-inik ukioqalersinnak pujortartaleruit ukioqatinnit pujortartanngitsunit eqqaamanerlunnerussaasutit.

NEQEROORUT

Pujortartarunnaarnissamut kaammattorneqarusukkuit ikiorneqarusullutillu, taava uani annertunerusumik paasisaqarsinnaavutit.

NAMMINEQ QANOQ ILIUUSEQARSINNAAVUNGA

Pujortartakkavit ikilisinnissaat unitsitsivinnissalluunniit misilittuartarsinnaavat – kingusinaanngisaannarpoq! Aammalumi misilittakkat takutippaat misiliinerit tamaasa pujortarunnaarnissamut pikkorissiartuinnartussaasutit.

QANIGISAT

Inuusuttumut pujortartartumut angajoqqaatut, ikinngutitut qanigisatulluunniit pingaaruteqarpoq unitsitsiniarnerani tapersersuinissat, naak illit nammineq ajornakusoortikkaluarlugu. Misissuinerit arlallit tikkuussipput meeqqat inuusuttullu killilersorneqarnissartik aammalu susinnaanerminnut susinnaannginnerminnullu ersarissunik malittarisassaqartinneqarnissartik pisariaqartikkaat. Taamaattumik meeqqatit oqaaqqissaarsinnaavatit pujortartaqqunagit, aammalu pujortartarneq peqqissutsimut qanoq akornutaatigisoq, naak illit nammineq pujortartuugaluarlutit. Meeqqat inuusuttullu amerlasuut toqqakkaminnut ileqquminnullu inersimasut akisussaassuseqarnissaat ujartortuuaat.

SAAFFIGINNINNISSAMUT PAASISSUTISSAT

Najukkanni pujortartarneq pujortarunnaarsitsiniarnermilu neqeroorutit pillugit apeqqutissaqaruit – pinaveersaartitsinermi siunnersortersi saaffigiuk.