Assakkut eksemerneq
Assatit pillugit – assakkut eksemertarneq pinaveersaartiguk. Assatit sakkussaraatit pingaarnerpaat, taamaammat paarilluarnissaat pingaaruteqarpoq.
Assakkut eksemi pillugu nassuiaat naatsoq
Assakkut eksemertarnerup ersiutigivai, ungillerineq, amikkut aappillertoorneq amerlu panerluni katagartoq. Assakkut eksemi ajorseriaraangat annernartumik amermi qulloortitsisinnaavoq aseruullunilu. Assakkut eksemerneq ulluinnarni suliaqarnermut ilungersortitsisinnaasarpoq, soorlu sulineq, illumi suliaqarneq, sunngiffimmi sammisassat imminullu isumaginermut. Assakkut eksemerneq aamma misigissutsikkut nanertisimanarsinnaavoq, amerlasuut assatik isikkui pillugit kanngusuttaramik.
Sooruna assakkut ekseminittarpit?
Assakkut eksemerneq ammip illersuutaa sanngiilligaangat, taavalu amermut iluaatsunik attuussaqattaaraanni imaluunniit sapikkanik attuussaqattaartaraanni pilersarpoq. Siornatigut atopiskiusumik eksemeqarsimagaanni (meeqqat eksemiat), taava uteqqissinnaavoq.
Katsorsaaneq
Assakkut eksemernermi siusissukkut nakorsiarit eqqortumik katsorsarneqarniassammat. Assakkut eksemerneq anigugassaanngitsumik atorneqarsinnaammat, taavalu katsorsartinnissamut sivisuallaamik utaqqigaanni ilungersunarnerulersinnaalluni.
Assakkut eksemernermut siunnersuutitsialaat qulit
1.
Masattunik suliaqartillutit aaqqateqartarit
2.
Sapinngisamik sivikitsumik aaqqateqartarit
3.
Aaqqatit putoqassanngillat, eqqiluitsuullutillu panertuussapput
4.
Aaqqatit saattut bomuldinik sanaat illersuutitut iluini atortakkit
5.
Assatit nillataartumi errortukkit, kuutsitsivigitillugit allarterluarlugillu
6.
Assannut ipeqarpianngitsunut tunillannartuiaat atoruk
7.
Sulitillutit assammioqarnaveersaarit
8.
Tarngut orsoqarluartoq tipigissaatitaqanngitsorlu atortaruk
9.
Assat tamakkerlugu tarngut atoruk
10.
Assatit paarilluakkit – sunngiffinni aamma
Assakkut eksemernerit suliffinniit pisinnaava?
Assakkut eksemerneq suliffiit pissutaalluni pinngorsinnaavoq ajorseriarluniluunniit, pingaartumik ullormut asaqattaartaruit imaluunniit kemikalianik suliaqartaruit. Assakkut eksemenerit suliffinnit pissuteqarpat, tamanna inuussutissarsiornermit nappaatitut nalunaarutigineqartariaqarpoq. Nakorsavit anmeld.gl aqqutigalugu nalunaarutiginninnissamut ikiorsinnaavaatit.
Assakkut eksemertarneq pillugu paasititsiniaalluni aalasuliaq
Kalaallit Nunaanni Peqqinnissaqarfik aamma Malou Media assakkut eksemertarneq pillugu paasititsiaalluni aalasuliorput. Aalasuliaq Kalaallit Nunaanni aalisarnerup suliassaqarfiani assakkut eksemertarneq pillugu ilisimatuussutsikkut misissuinerup ilagaa, LEO Fondet-ip aningaasaliiffigisaa. Aalasuliami assakkut eksemimik ersiutinik ilisarinnissinnaalissaatit qanorlu assatit paarilluarnissaannut kiisalu eksemimik pinaveersaartitsinissannik siunnersuutinik pissaatit.
Plakati uani
