Tamanna ima kinguneqarpoq:

• Danmarkimi nakorsartinnissamut/misissortinnissamut aggersarneqareersut piffissap allanngortinneqarnissaa pillugu attavigineqassapput.
• Kalaallit Peqqissartut illuat qanigisanut takkukkumaartussanut unnuinissamik neqeroorsinnaanngilaq.
• Qanigisaasut nakorsap aalajangigaanik ingiallortaasut pisarnertut Kalaalit Peqqissartut Illuanni unnuisarsinnaapput.
• Qanigisaasut nakorsap aalajangigarinngisaanik ingiallortaasutut Kalaallit Peqqissartut Illuanneereersut,  tunngaviusumik qanigisartik najugaqatigisinnaassavaat ajornanngippalli angerlamut uterniarnissamik eqqarsaateqarnissaannik kajumissaarneqarlutik.

Peqqinnissaqarfik COVID-19-imut ima sillimaniarpoq
Peqqinnissaqarfik, nunatsinni pisortat allat peqatigalugit, coronavirusip siaruaatinnginnissaanik -taamaalillunilu Peqqinnissaqarfiup malinnaasinnaanissaanut innuttaasunillu tamatuminnga eqqugaajumarsinnaasunik isumaginnissinnaanissaq anguniarlugu suliniuteqarnermi peqataavoq.

Peqqinnissaqarfik nappaammut Covid 19-imut imaaliornikkut sillimaniarpoq:

• Immikkoortortattat tunillatsissimasut tunillatsissimasinnaasullu iliuuseqarfigisinnaanissaannut eqqortunik atortorissaaruteqartinnerisigut eqqortunillu paasissutissinneqarnerisigut.
• Covid 19-ip iliuuseqarfigisinnaanissaanut atortussanik pisiortornikkut pilersorneqarnikkullu ajornartorsiuteqarsinnaanerup eqqumaffigineragut. Taamaammat allatut aaqqiissutissanut
• pisiortornissaq isumagineqarpoq. Tamatumunnga atatillugu Peqqinnissaqarfiup anersaartuutinut assiaqutinik, tappiorannartuiaatinik sprittimik imerpalasumik ikinertumilluunniit avataanut tunniussuissannginnera ilisimatitsissutigineqarsinnaavortaaq.
• Pisarnertut tunillaanaveersaarneq anguniarlugu eqqiluisaarnermi maleruagassat tamarmik malinneqarnissaasigut. Københavnimi Kalaallit Peqqissartut Illuannit Danmarkimi maleruagassat malinneqarmata pulaartoqaqqusaajunnaarneragut.

COVID-19-imik nappaateqalersimanermut pasitsaassinermi
Innuttaasutut nappaammik COVID-19-imik tunillatsissimanerit pasitsaakkukku najukkanni Peqqinnissaqarfiup oqarasuaatikkut attaviginissaa pingaaruteqarpoq. Tunillaannginnissaq siunertaralugu napparsimmavimmut peqqissaavimmulluunniit takkunnak sianeqqaarnissat pingaaruteqarpoq. Sulisut paasissutissanik makkunannga piniarfigissavaatsit: Kingullermik sumut angalasimanerit, tunillatsinnissamut immikkut navianartorsiorsimanerit, qanoq sivisutigisumik nappaammut ersiuteqarsimanerit qanorlu kissarneqarnerit.

Pisut naliliivigineqartuarput
Peqqinnissaqarfimmit pisut Tunillaassuuttunik Nappaalanersuaqalernerani Ataatsimiititaliarsuup innersuussutaai aallaavigalugit nalilersuiffigineqartuarput. Peqqinnissaqarfimmilu nukissaqarnissap qanoq qulakkeernissaa suliniutigineqartuarluni.
Pingaarnersiuilluni tulleriiaarineq nunani allanisuulli ingerlavoq, tassalu tuniluunnerup unitsinnissaa, virusi takkuppat Peqqinnissaqarfimmi immikkoortortat qitiusumillu immikkoortut artukkerneqaqqunagit titarnerup qullariartorunnaarluni narluinnalernissaa anguniarneqarpoq.

COVID-19-pillugu paasissutissat
Nappaat COVID 19 pillugu paasissutissat Nunatsinni Nakorsaaneqarfiup nittartagaani nutarterneqartuarput. Innutaasut nittartagaq taanna nun.gl aqqutigalugu paasissutissanik nutaanerpaanik pissarsiniartarnissaannik Peqqinnissaqarfimmit kajumissaarneqarput.
COVID-19 pillugu nalinginnaasumik apeqqutissallit oqarasuaatip normuanut immikkut sianerfissamut: 801100 innersuunneqarput.

Kiffartuussinermi allannguinerit sullitatsinnut ajornakusuulersitsiumaarnerat Peqqinnissaqarfimmi qullersat ajuusaarutigaat, matumanili immikkut ittumik pisoqarnerani paasinnilluarnissaq neriuutigalugu.