Ulloq 22. – 23. marsi Peqqissutsimut Naalakkersuisoq, Agathe Fontain tarnikkut nappaateqarneq pillugu ataatsimiisitsissaaq. Soqutiginnittut tamarmik tikilluaqqusaapput. 

-”Tarnikkut nappaatit pillugit ataatsimiinneq inunnik toqqaannartumik toqqaannanngitsumilluunniit tarnikkut nappaatilinnik sullissisunut imaluunniit tarnikkut nappaatilinnik ilaqutalinnut tamanut ammavoq. Ataatsimiisitsinermi siunertarineqarpoq tarnikkut nappaatilinnut periarfissat ersarissarnissaat taakkuninngalu immikkoortortaqarfiit akimorlugit sullissinerup patajaannerulersinnissaat,” taama Peqqissutsimut Naalakkersuisoq Agathe Fontain oqarpoq, imalu nangilluni:

- ”Tarnikkut nappaatit oqaluuserineqarnissaat pisariaqartinneqarluinnarpoq, aamma tamatumunnga tunngatillugu nukiit katersorneqarnissaat pisariaqarpoq. Tarnikkut nappaatit suli paquminartutut isigineqartarput, ilaqutaasut amerlasuut kisimiittutut misigipput.  Taamaattumik ilaqutariit ataatsimiisitsinermi pingaarutilittut inissisimatinneqarput.”

Tarnikkut nappaatit pillugit ataatsimiisitsinermi nunatsinni tarnikkut peqqissuseq sammineqassaaq. Ilaqutaasut nappaatilinnillu sullissisut suleqatigiinnerat pingaartumik sammineqassaaq. Tarnikkut nappaatit pillugit ataatsimiisitsinermi eqimattakkaartitsisoqassaaq, tassanilu peqataasut unamminiarnartut, ajornartorsiutit aaqqiissutaasinnaasullu eqqartornissaannut periarfissaqassapput. 

Peqqik.gl-imi ataatsimiisitsineq pillugu atuarnerugit ilaasussatullu nalunaarlutit. Kingusinnerpaamik 1. marsi ilaasussatut nalunaartoqarsinnaavoq. 

Paasisaqarnerorusukkuit Naalakkersuisup allattaa Nauja Møller mobilikkut: +299 58 26 54-ikkut imaluunniit e-mailikkut: nmoe@nanoq.gl attavigiuk.