Marthap suleriaaseq pillugu Peqqissutsimut ministeri oqaloqatigerusuppaa
Tarnip nappaataanut nakorsap, Qallunaat Nunaanni kukkusumik napparsimasunik katsorsaasarsimanera pillugu, Peqqissutsimut Naalakkersuisoq Martha Lund Olsen-ip suliniutigaa Qallunaat Nunaanni Peqqissutsimut minister Nick Hækkerup oqaloqatiginissaa nunatsinni Peqqinnissaqarfimmi oqartussanut suliani assingusuni paasissutissiisoqartassanersoq.
Ippassaq Qallunaat Nunaanni Peqqissutsimut ministeri, Nick Hækkerup, isumasioqatigiinnermut aggersarneqarpoq, suliamut tarnip nappaataanut nakorsap kukkusumik katsorsaasarsimanera aammalu Peqqissutsimut aqutsisoqarfiup suliami peqataanera pillugit. Tassani ministerip nassuiarpaa, Savalimmiut aamma Kalaallit Nunaat suliamut tunngatillugu erngertumik paasissutissinneqarsimanngitsut, suliani taama ittuni siornatigut ileqquusimanngimmat paasissutissiisoqartarnera.
-”Isumaqarpunga, pissusissamisoorsimassagaluartoq, Peqqissutsimut aqutsisoqarfimmit tarnip nappaataanut nakorsap kukkusumik katsorsaasarsimanera aammalu Kalaallit Nunaanni atorfeqarsimanera paasineqarmat erngertumik Kalaallit Nunaannut paasissutissiisoqarsimassagaluarnera”, oqarpoq Peqqissutsimut Naalakkersuisoq, Martha Lund Olsen, nangillunilu:
- ”Aatsaat tarnip nappaataanik nakorsaq pillugu suliamik paasissutissinneqarpugut marsimi ukioq manna, massa Norge Sverigelu aamma atorfeqarfigisimasai 2012-imili Peqqissutsimut aqutsisoqarfimmiit paasitinneqarsimasut. Ministerip isumasioqatigiin-nermi oqaatigaa Nunat Avannarliit allat assigalugit Kalaallit Nunaat paasissutissinneqar-talissasoq. Peqqissutsimut ministeri ataatsimeeqatiserilaarniarpara oqaloqatigiissutiga-lugulu siunissami suliamik assingusumik pisoqassagaluarpat qanoq Kalaallit Nunaat paasissutissinneqartassanersoq”, oqarpoq Peqqissutsimut Naalakkersuisoq, Martha Lund Olsen.
Paasissutissanik piniarluni attavigineqarsinnaavoq Peqqissutsimut Naalakkersuisoq Martha Lund Olsen allattaatigut Lea Holm ugguuna +299 346605 imaluunniit e-mail leah@nanoq.gl