- Maanna ilinniartitaanermik danskit ilinniartitaanerisa pitsaassusaannut ilinniartitaanerlu pillugu kaajallaasitaannut assingusumik nunatsinneersumik nunatsinnilu pissutsinik aallaaveqartumik peqalerpugut, peqqissaasut qullersaat Ella Skifte oqarpoq.
Ilinniartitaaneq ukiunik marlunnik sivisussuseqarpoq Ilisimatusarfimmullu atalluni. Ilinniartup ilinniarneq pillugu paasissutissiinertalimmik ilinniarnini nunatsinni aallartissavaa. Tamatuma kingorna ilinniartup Danmarkimi napparsimmavimmut aalajangersimasumut attaveqarluni atuagarsorneq – kingornalu
sulinermik sungiusarneq aallartissavai. Naggataagut ilinniarneq nunatsinni inaarneqassaaq ilinniartorlu uppernarsaatitut allagartartaartinneqassalluni.
Ilinniartoq ataaseq aallartereerpoq. Tanja Andreasen-ip 2016-imi ukiakkut Dronning Ingridip
Napparsimmavissuani pinasuagassanut immikkoortotaqarfimmiittup ilinniakkamillu tamatuminnga juulip ulluisa aallaqqaataanni aallartitsisup- ilinniarnini aallartilluareerpaa.
- Ilinniartitaaneq tamakkiisoq nunatsinnit aallaaveqarpoq – tamannalu pingaaruteqaqaaq. Taamaaliornikkut ilinniartoq ilinniarneq naammassippat sulilernissamut sakkussaqarnerusutut misigisimassaaq, Ella Skifte oqaluttuarpoq.

Ilinniartitaaneq
Ilinniartitaaneq ukiuni kingullerni pingasuni inerisarneqartoq Dronning Ingridip Napparsimmavissuani pinasuagassanut immikkoortortaqarfimmi ilinniartitaanermut suliniuteqaqataasumit
nuannaalersitsivortaaq.- Tamanna Peqqinnissaqarfimmut imaannaanngilluinnarpoq peqqissaasuuneq immikkoortortamilu peqqissaassutut pisortaasoq Jens Jørgen Lemvig taama oqarpoq. Peqqinnissaqarfimmi kalaallit peruluttunik peqqissaasutut-, sinititsisartutut- pilattaavimmilu peqqissaasutut immikkut ilinniagallit 45-it 50-illu missaanniittut pisariaqartippagut, taamaammat ilinniartitaaneq taanna nunatsinni peruluttunik peqqissaanermi annertuumik kivitsissaaq, Jens Jørgen Lemvig oqarpoq.

Sinititsisartut pilattaasarfimmilu peqqissaasut
Taamatuttaaq sinitsitsisutut ilinniartitaaneq piviusunngoraluttualerpoq, taassumalu 2017-imi ukiakkut akuersissutaanissaa naatsorsuutigineqarpoq ilinniartunngortussarlu siulleq 2018-imi januaarip
aallaqaataani ilinnialernissaq siunertaralugu atorfinitsinneqassalluni. Pilattaavimmi peqqissaasutut ilinniartitaaneq immikkut ilinniartitaanertut akuerisassanngorlugu pilersaarusiorneqarportaaq.
- Innuttaasunik pitsaanerpaamik sullissisinnaajumalluni Peqqissaasunik illugiinnik oqaasilinnik ilinniartitsinissaq, suliamut annertuumut kajumissaataasimavoq, Jens Jørgen Lemvig oqarpoq.

Kalaallit Nunaannit aallaavilik
Ilinniartitaaneq Ilisimatusarfimmi aallartinneqarlunilu naammassineqassaaq, tamannalu instituttip pisortaa Suzanne Møller naapertorlugu ilinniartitaanerit inuiaqatigiinnut iluaqutaalernissaannut aalajangiisuussaaq.- Ilinniartitaanerni ilinniartut nunatsinni immikkoortortaq attavigisartik suleqatigalugu ilinniagaqassutsikkut naapertuuttumik- ilinniartumut Peqqinnissaqarfimmullu soqutiginaatilimmik naggataarutaasumik allattariarsukkanik suliaqassapput. Taamaalillutik suliat ilisimalikkallu inuiaqatigiinnut iluaqutaassapput, Suzanne Møller naggasiivoq.

Paasissutissat sukumiinerusut
Tusagassiorfinnut nalunaarut una pillugu paasissutissat sukumiinerusut peqqissaasut qullersaannut Ella Skifte–mut mailikkut: ella@peqqik.gl attaveqarnikkut
pissarsiarineqarsinnaapput.