Tasersuup Atuarfia Atuarfimmi allorarnerni ajugaasuuvoq
Pississaarneq, qitinneq, pisunneq, arpanneq. Peqqissutsimut Naalakkersuisoqarfiup piareersaatitut sammisaani, Atuarfimmi allorarnernut, klassi arfineq pingasuusuni amerlanerpaamik alloriarnissamut unammisitsinermi suut tamarmik atortariaqarput. Naak ataasiinnarmik ajugaatitsisoqassagaluartoq, peqataasut tamarmik atuarnerup nalaani aalanerulernermi eqqugassaqarput.
Piareersaatitut sammisaq Atuarfimmi allorarnerit atuarnerup nalaani aalanermik peqatigiinnermillu ukkataqartitsivoq. Klassini atuartuni peqataasut ullut tamaasa sapaatip akunnerini pingasuni atuarnerup nalaani allorarnernik kisitsissummik tigumiagaqarsimapput. Sapinngisamik amerlanerpaamik allorarnissamik suliassiissutaavoq. 2016-mi novembarimi klassit arfineq pingasut piareersaatitut suliniummi peqataasut Qaqortuminngaanneersuupput, Aasiaanninngaannersuupput Tasiilaminngaanneersuullutillu.
Peqqissutsimut Naalakkersuisup, Agathe Fontainip, klassini pitsaanerpaamik angusaqartoq makippaa. Ajugaasut tassaapput 4.c Qaqortumi Tasersuup Atuarfianeersut.
-”Meeqqat timiminnik aalatitsilluartut inuummarinnerusarput atuarfimmilu pitsaanerusumik angusaqartarlutik. Taamaattumillu atuarnerup nalaani aalanerulernissamik suliaqarnissaq tamanut pissutissaalluarpoq. Inuuneritta II-mi siunertaavoq meeqqanut atuartunut tamanut akunneq ataaseq atuarnermi skiimamut ilanngunneqarnissaa. Piareersaatitut suliniummi Atuarfimmi allorissaarnermi siunertaq tamanna ikorfartorneqarpoq, taamatuttaarlu atuarfimmi skiimat qanoq isikkoqarsinnaaneranik takutitsisuulluni”, Peqqissutsimut Naalakkersuisoq, Agathe Fontain oqarpoq.
Ilinniartitsisut atuartullu suliniut assut nuannersumik misigisaqarfigaat. Ilinniartitsisut peqataasut ilaat imatut oqaaseqarpoq: ”Isumaqarpunga suliniut pitsaasuusoq pissutigalugu atuartunut toqqaannartumik aalanerulernissamut tunngavissamik kajumissuseqalernermik suliaqarusulersitsinermillu tunisisuugami. Suliniut tamanna kajungerivaat, suliniutillu iluatsinnissaanut uanga iliuuseqarpallaartariaqanngilanga.”
Peqqissutsimut Naalakkersuisoqarfik piareersaatitut sammisamut suliaqartuuvoq, siunissamilu pilersaarutaavoq ukiumoortumik nuna tamakkerlugu unammissutigineqartalissasoq. Ilisimatusaatitut misissuinerit arlallit takutippaat alloriarnernik kisitsissummik atuinerup annertunerusumik aalanerulernissaq eqqumaffigineqalersartoq. Taamaasilluni alloriarnernik kisitsissut aalanerulernissamut atorluarneqarsinnaavoq.
Annertunerusumik paasisaqarusukkuit naalakkersuisumut allatsi mobil: +299 58 26 54 imaluunniit e-mail: nmoe@nanoq.gl attavigineqarsinnaavoq.