Ammaanersiornermi oqalugiartoq Peqqissutsimut inunnullu Innarluutilinnut Naalakkersuisoq Anna Wangenheim ilaatigut ima oqarpoq: "Ullumi ammaanersiuinnanngilagut, aammali aallarnerparput Nunatta peqqinnissakkut oqaluttuarisaanerani kapitali nutaaq. Peqatigiilluta qulakkiissavarput una illu kusanartorsuaq illuinnaanani aammali tassaassasoq neriuutit, ilisimasat isumassuinerillu naapittarfiat. Illu Nunatsinni inuit nunatsinni sumiikkaluartulluunniit inuunerinnerulernissaannik suliaqarfiusoq.
Aningaasaateqarfiup Novo Nordisk Fondenimeersup Marie Louise Hartoft-Nielsenip suliniuterpassuit aallarnisarneqareersut oqaaseqarnermini assut nersualaarpai, qilanaarinerarpaalu illutaarsuarmi kusanartunik avatangiiseqarlutik qanoq ingerlateqqinneqarnissaat malinnaavigissallugu.
Oqaaseqartoqarneri akunnilertarlugit Peqatigiiffik Inngertartut alutornartumik aliikkusersuisarput. Aliikkusersuisunullu aamma ilaarngaarput Stenomi KOL-ertut erinarsoqatigiivi, ukiormanna apriilimi aallartittut. Erinarsoqatigiit nuannisartitsinermikkut takutippaat KOL-imik pualluuteqaraluarluniluunniit qanoq erinarsorneq inuunerinnerulernissamut aamma iluaqutaasinnaanersoq.
Inuunerissaaviup pisortaa Marit Eika Jørgensen naggasiilluni oqaaseqartuuvoq: "Isumaqarpunga matuma illup atorluarneqarneratigut peqqinnissaqarfik inuiaqatigiinnut ammanerulersissinnaagipput. Soorlu KOL-eqartut erinarsoqatigiivisa takutikkaat peqqinnissaqarfik kulturilu aamma suleqatigiissinnaapput. Periarfissarpassuit killeqanngillat pikkorissaanertigut, oqalugiarnertigut, inuunerissaavitsigut aammalu sungiusariaatsit napparsimasunut, suleqatinut inuiaqatigiinnullu sammititat neqeroorutigisarnerisigut."
Ammaanersiorneq nangillugu innuttaasunut illutaarsuarmi kaffillertoqarpoq. Eqquiniaasitsinerit illumilu takuniaasitsinerit ingerlanneqarput. Illutaarsuarmi takuneqarsinnaasunut ilaapput diabetesertunut, KOL-ertunut imaluunniit aap naqitsineranik qaffattoorsimasunut katsorsaanikkut neqeroorutit. Inuunerissaavimmissaaq aqunneqarpoq ungasissumiittunut attaveqaat appi Puisa, maannakkut sinerissatsinni napparsimasunut attaveqaatitut atorluarneqalereersoq.
Pisortatigoortumik ammaanersiornermi inuit 150-it missaat ualip ingerlanerani centerimut takuniaapput.
Inuunerissaaviup pilersinneqarnerani suleqatigiipput Namminersorlutik Oqartussat, Nunatsinni Peqqinnissaqarfik aamma Novo Nordisk Fonden. Aningaasaateqarfiup 2017-imi saqqummiuppaa Kalaallit Nunaanni centeriliortoqassappat aningaasaleeqataajumallutik. Aappaaguani Aningaasaateqarfiup Naalakkersuisullu anguniagassatut siunniussartik akueraat. 2020-mi Inuunerissaavik Stenop pilersikkiartornera qanoq suliarineqassanersoq isumaqatigiissutigineqarpoq, ukiorlu taanna peqqinnissaqarfiup ilagisaatut Inuunerissaavik aallartinneqarpoq.
Ataani takuneqarsinnaapput ammaanersiornermit assilisat.