Assi: Ulrik Bang

Peqqissutsimut Naalakkersuisoqarfik Christopher Schmitz aamma atuakkiorfik èdito suleqatigalugit atuagaq ”Hashimik pujortartartumik qitornalimmut” kalaallisut nutsertippaat. Atuagaq inuusuttut hashimik pujortartartut angajoqqaavinut imminnut ikiornissaannut atuakkiaavoq. Atuagaq aamma inuusuttunik sullissisartunik imaluunniit angajoqqaanik inuusuttuaraatilinnik siunnersortinnissaminnut pisariaqartitsisunut piukkunnarpoq. 

-”Hashi inuiaqatitsinni ajornartorsiutaavoq annertooq annertusiartortorlu. Hashimik atuineq ernumanartumik annertusiartortoq takuarput, pingaartumik angutini inuusuttuaqqani. Taamaattumik nuannaarutigaara maanna angajoqqaat suliamullu tunngasumik suliaqartut inuusuttut hashimik atuinngitsoorsinnaajunnaarnerminik ikiorneqarnissaanut kalaallisut sakkussaasinnaasumik neqerooruteqarsinnaagatta,” taama oqarpoq Peqqissutsimut Naalakkersuisoq, Agathe Fontain nangillunilu:

- ”Hashimik atuineq unitsinniarlugu inuiaqatigiittut ataatsimoortariaqarpugut. Amerlasuut hashi uloriananngitsutut isumaqarfigigaat paasivara. Kisinni ilisimatusarnerup takutippaa ingammik inuusuttuaqqanut hashi pinngitsuuisinnaajunnaartitsisartoq ulorianaateqartorlu. Hashi pillugu oqallikkaangatta aamma meeqqavut hashi pillugu oqaloqatigigaangatsigit piviusut tunngavigisariaqarnerat pingaaruteqarluinnartoq tamanna siammarterusuppara.”

Imminut ikiornissamut atuakkiami angajoqqaat inuusuttullu akornanni oqaloqatigiinnermi hashimik atornerluineq qanoq unitsinneqarnissaanut tigussaasunik siunnersuuteqarpoq. Oqaloqatigiinneq tatiginninnerlu pingaarutilimmik inissisimapput. Pisuni arlalinni angajoqqaatut oqaloqatigiinneq qanoq ingerlatissanerlugu atuakkami arlalinnik pisuusaartitsinernik imaqarpoq tigussaasunillu siunnersuutinik imaqarluni. 

Atuakkiortoq Christopher Schmitz arlaleriarluni Kalaallit Nunaani  suliamik ilisimasalinnik angajoqqaat inuusuttumik hashimik pujortartartunik oqaloqateqarnissamut  sakkussanik suliaqartartoq  ima oqarpoq; 

- ”Atuagaq “Hashimik pujortartartumik qitornalimmut” kalaallisuunngortinneqarnissaanut Peqqissutsimut Naalakkersuisoqarfik suleqatiginissaanut aalajangersimavunga hashimik atornerluinermut katsorsarnermut misilittakkat pitsaasut avitseqatigiumallugit. Misissuinerup takutippaa inuusuttup hashimik atornerluijunnaavinnissaa anguniarlugu angajoqqaat peqataatinneqarnissaat pisariaqarluinnartoq.”

Atuagaq ”Hashimik pujortartartumik qitornalimmut” peqqik.gl-imi aaneqarsinnaavoq. Atuakkap qallunaatoortaa édito´p nittartagaatigut: edito.dk –mi pisiarineqarsinnaavoq. 


Paasissutissat allat naalakkersuisumut allatsi Nauja Møller oqarasuaat: +299 58 26 54 imaluunniit e-mail: nmoe@nanoq.gl pissarsiarineqarsinnaapput.