Pisiffik Brugsenilu imigassamut aalakoornartortalimmut inatsimmut isertitassaminnut ernumassuteqartut paasisinnaavara, taamaattumillu Inatsisartunut sapinngisartik naapertorlugu inatsimmut atuutilersitsinissamut itigartitsissutigineqarnissaanut sunniiniarlutik. 

Pisiffik aamma Brugseni akinik qaffaanissaminnut, ilinniartut sulisullu 18-nit inorlugit ukiulinnik ikilisaanissaminnut sioorasaaripput. Inuusuttut 18-it ataallugit ukiullit imigassamik aalakoornartortalimmik tuniniaasinnaajunnassammata imigassamik aalakoornartortalimmik inatsisip inuusuttut amerlanerusut suliffissaaleqilissasut oqaatigaat. Isumaga malillugu tunngavilersuut allannguutissatut siunnersuut malillugu equngasorujussuusoq.

Maannakkununa uagut politikeriusugut aalajangiusimasussaasugut isummersortussaallutalu. Suliassaraarput inuiaqatigiit pitsaasumik inuunissaannut sinaakkusersuinissaq. Taamaattumik imigassamut aalakoornartortalimmut inatsiserput meeqqatsinnut inuusuttortatsinnut, siunissatsinnut, isumaginnittuussaassooq. Uani suliffeqarfinnut imigassamik aalakoornartortalimmik aningaasarsiortunut soqutiginninneq pingaannginnerutillugu.

Isumaqarpunga imigassamik aalakoornartortalimmik imissagaanni 18-leereersimasussaatilluni taava aamma imigassamik aalakoornartortalimmik tuniniassagaanni 18-leereersimasussaasariaqartoq. 16-nik ukioqarluni nalunngisaq imaluunniit malunnartumik aalakoortoq itigartinnissaanut ajornakusoorsinnaavoq. Akisussaaffik tamanna inuusuttortatsinnut tunniutissanngilarput. Tamatta pisussaaffeqarpugut – aamma pisiniarfiit – inuusuttut 18-it ataallugit ukiullit illersussallugit. 

Ullumikkut tallimanngornermi, Pisiffik aamma Brugseni imigassat aalakoornartortallit pisiassanut allanut assersorpaat inatsisissamut siunnersuut akerlilersorlugu. Inuttut qilanaaraara assiaqusersuinissamut siunnersuut piviusunngortinnissaanut misigissallugu. Pisiffik aamma Brugseni ullormiit ullormut assiaqusersuinerata takutippaa imigassamik aalakoornartortalimmik assiaqusersuineq pisiniarfinnut akisusariaqannngitsoq ajornakusoortariaqanngitsorlu. Neriuutigaara Pisiffik-mi Brugenimilu ullumikkut pisiniartorpassuit imigassamik aalakoornartortalimmik assiaqusersuineq pitsaasutut misigisimassagaat.

Imigassamik aalakoornartortalimmik assersuineq WHO iliuusissanik nunarsuaq tamakkerlugu pitsaaliuinissamut innersuussutigaa. WHO innersuussivoq takussaannginnerusumik, tikikkuminaannerusumik minnerusumillu ussassaarineq pitsaaliuinermut sakkussaasut pitsaasut. Tamanna imigassamik aalakoornartortalimmik assersuinissamik siunnersuummut tunuliaqutaavoq, taamaasilluni imigassaq aalakoornartortalik takussaannginnerulerluni tikikkuminaannerulerlunilu.

Imigassaq aalakoornartortalik aanngajaarniutaavoq. Immuttut errorsinermullu qaqorsaatitut ulluinnarni pisiassatut inngilaq. Tamanna meeqqatsinnut inuusuttortatsinnullu oqariartuutigissallugu pingaaruteqarluinnarpoq. Naalakkersuisut inatsisissami siunnersuummi siunnersuutigaat, pisiniarfiup namminneq qanoq imigassaq aalakoornartortalik assiaqusersussanerlugu aamma aningaasartuutissat assiaqusersuinissamut qanoq amerlatigissanersut nammineq aalajangissagaat. 

Imigassamik aalakoornartortalimmik atornerluineq pitsaaliussagutsigu imigassamut aalakoornartortalimmut inatsit kisimi ilaanngilaq kisianni inissinnissaanut pingaaruteqarluinnarpoq, nalunngilarpummi meeqqatsinnut inuusuttortatsinnullu amerlasuunut kingunerlutitsisoq. Kissaatigisarput malillugu iliuutsit tamarmik atorlugit inuiaqatigiit peqqissut angujumallugit iliuuseqassaagut. Inuiaqatigiiusugut, meerartavut inuusuttortavullu siunissami qaamasumi pitsaanerpaamik atugassaqartillutigit. 


Paasisaqarnerorusukkuit naalakkersuisumut allatsi Nauja Møller oqarasuaat: +299 58 26 54 imaluunniit e-mail: nmoe@nanoq.gl attavigineqarsinnaavoq