Kalaallit Nunaanni meeqqat inuusuttullu tupatornermut, hash-imik pujortarnermut naamaarnermullu rekortiliipput. Meeqqat akornanni 24 %-it- tassalu meeqqat sisamararterutingajaat- suli 14-iliinatik imigassartorsimasut, misissuinerit takutippaat. 22 %-it tassalu amerlaqatingajaat hash-imik misiliisimapput,18 %-it naamaarneq misilissimavaat meeqqallu pingajorarterutaat sinnillit 13-it inorlugit ukioqarlutik pujortalersarput. Kalaallit Nunaat taamaasilluni Europami Amerikallu Avannaani nunanut 70-inut sanilliullugu meeqqanik pujortartoqarnerpaajuvoq.
Tunuliaqutarlu ernumanartoq taanna tunngavigalugu Peqqissutsimut Attaveqarnermullu Naalakkersuisoqarfik pinaveersaartitsineq annertusaavigalugu iliuuseqalerpoq. Meeqqat atuarfii inuusuttullu ilinniarfii atuagaaqqanik meeqqat inuusuttullu aanngajaarniutinik navianartunik atuiaarpallaarnissamut naaggaarsinnaanissaannut atortussanik tigusaqaqqammerput.
Meeqqat piffissami annertuumi atuarfimmiittarnerat atuarfimmilu aanngajaarniutit tupalu pillugit ileqqut isummallu meeqqat qanoq ileqqoqarnerannut aalajangiisuusarnerat, pinaveersaartitsinerup atuarfinnut sammitinneqarneruneranut patsisaavoq. Atortussiat 1.klassimiit atorneqassapput atuarfiillu aanngajaarniutit tupatornerlu pillugit politikkimik ersarissumik atuartunit, angajoqqaanit ilinniartitsisunillu atorneqarsinnaasumik ineriartortitsinissaat piviusunngortinniarneqarpoq.
Atuarfik tassaavortaaq angajoqqaat nalinginnaasumik naapittarfiat, isummanik meeqqallu inuttut inooqataanermi toqqammavissaat pillugit oqallittarfiat. Tassani meeqqat inuusuttullu tupamut, imigassamut aanngajaarniutinullu allanut pissusilersuutaasa qanoq iliuuseqarfiginissaa pillugu maleruagassanik tamanut atuuttussanik angajoqqaat isumaqatigiissuteqarsinnaapput.
Peqqissutsimut Attaveqarnermullu Naalakkersuisoq Steen Lynge pinaveersaartitsinerup annertusarneqarnissaa naammagisimaaqaa. Atortussat atuarfinnit ilassilluarneqarumaartut kiisalu aanngajaarniutit tupalu pillugit politikkiliornissamut siunnersuutit malinneqarumaartut neriuutigaa:
”Siusinaartumik iliuuseqarusuppugut. Meeqqat inuusuttullu pitsaasunik peqqinnartunillu ileqqoqalernissaannut atuarfiup angajoqqaallu iliuuseqarnerat tamatumunnga aalajangiisuussaaq. Meeqqagut imigassamik, tupamik ikiaroornartunillu misiliinissaat pinngitsoortinniarsinnaagutsigit, peqqissumik pitsaasumillu inuunissaannik aqqutissiuussuagut.”
Paasissutissat sukumiinerusut peqqinnissaq pillugu siunnersorti Lisa Christiansen oqarasuaatikkut: +299 34 66 50 imal. e-mail-ikkut: lich@nanoq.gl attavigalugu pissarsiarineqarsinnaapput
Inuusuttuaraatit
imigassamut, tupamut aamma ikiaroorniutinut illersoruk
Inuusuttut
imigassamut, tupamut aamma ikiaroorniutinut illersorsigit
Qitornat
imigassamut, tupamut aamma ikiaroorniutinut illersoruk
Meeqqat inuusuttullu
imigassamut, tupamut aamma ikiaroorniutinut illersukkit