Kommunini pisortat imigassaq pillugu pikkorissarnerat
Imigassamik hashimillu atornerluineq Kalaallit Nunaanni innuttaasut peqqissusaannut ajornartorsiutit ataasiakkaat annersaaraat. Atornerluisunik katsorsaanermut atatillugu suleqatigiinneq patajaalllisarniarlugu Peqqissutsimut Attaveqarnermullu Naalakkersuisoqarfik, imigassaq atornerluinerlu pillugit, kommunini pisortanik pikkorissaaqqammerpoq.
-”Ataatsimoorluta atornerluinermut tunngatillugu nuna tamakkerlugu politikkikkut anguniagassatut siunniussat suleqatigiissutiginissaannut, kommunit Namminersorlutillu Oqartussat assigiimmik periuseqarnissaat pingaaruteqarpoq. Pikkorissarnermi periutsit nutaanerpaat tusarpagut atornerluisunillu katsorsaanermut tunngasunik ataatsimoorus-satsinnik ilisimasaqalerluta. Tamanna atornerluinerup inuiaqatigiinni unammilligassap annertoqisup ataatsimoorullugu qanoq suleqatigiissutigineqarsinnaanera pillugu oqaloqatigiinnermik kinguneqartussamik pilersitseqataavoq”, taama oqarpoq immikkoortortami pisortaq Julie Præst Wilche imalu nangippoq:
-” Pikkorissaaneq, innuttaasut peqqissuunissaat anguniarlugu suliniummi Inuuneritta II-mi imigassaq pillugu iliuusissatut pilersaarutinut ilaavoq. Peqqissutsimut Attaveqarnermullu Naalakkersuisoqarfiup, atornerluineq atornerluisunillu katsorsaaneq oqartussaasullu atornerluisunut katsorsaanermut neqeroorutaannik ineriartortitsineq piuminarneruleqqullugu pitsaaneruleqqullugulu kommuninik qanimut suleqateqarneruler-nissamut aallarniutaasutut, tamanna isigaa.”
Pikkorissaanermi anguniagassatut siunniunneqarput:
• Kommunit Namminersorlutillu Oqartussat suleqatigiinnerisigut atornerluisunik katsorsaanerup patajaallisarsinnaanerata oqaluuserineqarnissaa, siunissamilu innuttaasunik katsorsaanermut tunngatillugu assigiiaamik- assigiinngisitaartunillu neqerooruteqarnissap sulissutigineqarnissaa.
• Innersuussinermi-, katsorsaanermi- tamanna sioqqullugu tamatumalu kingorna tapersersuinermut atatillugu, tulleriiaakkamik aaqqissuussinerup qulakkeernissaanut kommunerujussuarni sulisunut iluaqutaasussanik peqataasut sakkussinnissaat.
Ilisimatooq Ulrik Becker Adjunktilu PhD-mik ilisimatusarsimasoq Anette Søgaard Nielsen, Danmarkimi atornerluinermut tunngasunik immikkut ilisimasallit akornanni siuttut ilaat ilinniartitsisuupput. Imigassaq pillugu ilisimatuussutsikkut paasisanik atornerluisunillu katsorsaanermi periutsinik nutaanerpaanik saqqummiussipput.
Pikkorissaaneq naggaserlugu maleruagassanut-, innersuussinermi maleruagassanut-, qarasaasiaq atorlugu attaveqatigiinnermut ilinniartitaanissamullu kommunit pisariaqartitsinerannut tunngasut oqaluuserineqarput. Kommunittaaq siunissami peqqinnissaqarfimmik suleqateqarnissamut tunngatillugu eqqarsaatinik kissaatinillu aniatitsinissamut periarfissinneqarput.
Paasissutissat sukumiinerusut immikkoortortami pisortaq Julie Præst Wilche oqarasuaatikkut +299 34 66 25 imal. e-mail-ikkut jprw@nanoq.gl attavigalugu pissarsiarineqarsinnaapput.