Niuertarfinni imerniartarfinnilu sulisunut internetikkut pikkorissartitsinerit 15. februarimi aallartinneqassapput
Imigassaq pillugu inatsit nutaaq 1. marts 2018-imi atuutilerpat sulisut imigassanik aalakoornartortalinnik tuniniaanermik sassaallertarnermillu suliaqartut akisussaassuseqartumik nioqquteqarnissamut akisussaassuseqartumilluunniit sassaallernissamut pikkorissartinneqassapput. Sulineq aallartitsinnagu akisussaassuseqartumik tuniniaanissamut sassaallernissamullu internetikkut pikkorissartitsinernik Peqqissutsimut Naalakkersuisoqarfik suliffeqarfinnut neqerooruteqassaaq.
-”Imigassaq pillugu inatsisip nutaap ilaatigut nassatarissavaa imigassanik aalakoornartortalinnik tuniniaanermik sassaallertarnermilluunniit suliaqartut akisussaassuseqartumik nioqquteqarnissamut sassaallernissamullu pikkorissartinneqassammata. Sulisut taama ilinniartinneqarnissaannik piumasaqaateqarnermi tunngavigineqartoq tassaavoq imigassamik aalakoornartortalimmik atornerluinerup pitsaaliorneqarnerata nukittorsarneqarnissaanik aammalu unnuaanerani pissutsit toqqissisimanartuunissaannik Naalakkersuisut kissaateqarnerat”, taama oqarpoq Peqqissutsimut Naalakkersuisoq, Agathe Fontain.
Sulisitsisut sulisullu akisussaassuseqartumik nioqquteqarnissamut sassaallertarnissamullu internetikkut pikkorissarnernut nittartakkakkut certifikat.gl aqqutigalugu peqataasussatut nalunaarnissamut februaarip aallartinneranili periarfissaqalerput.
Akisussaassuseqartumik sassaallernermik pikkorissartitsineq sassaallertarfinni sulisunut naleqqussagaavoq aammalu akisussaassuseqartumik nioqquteqarnermik pikkorissartitsineq niuertarfinni imigassanik aalakoornartortalinnik nioqquteqarnermik sulisunut naleqqussagaalluni.
Ulloq 15. februar pikkorissartitsineq pillugu nittartagaq iserfigineqarsinnaalissaaq aammalu atuisut peqataaniarlutik nalunaartut pikkorissarnerit pillugit iserfissanik nassinneqarsinnaalissapput.
Sulisut imigassanik aalakoornartortalinnik tuniniaanermik sassaallertarnermilluunniit suliaqartut akisussaassuseqartumik sassaallernermik tuniniaanermilluunniit pikkorissarnerni peqataasimanissaa akuersissummik pigisaqartut akisussaaffigaat. Nakkutilliiartortoqartillugu sassaallerfiusartoq nioqquteqarfiusorluunniit sulisut pikkorissarsimanerannut uppernarsaammik takutitsisinnaassapput.
Paasititsiniaanermut atortussat aammalu pikkorissarnerit Malou Media suleqatigalugu periarfissanngortinneqarpoq.
Annertunerusumik paasissutissat pissarsiariniaraanni attavigineqarsinnaavoq naalakkersuisumut allatsi Nauja Møller,mobil: +299 58 26 54 imaluunniit e-mail: nmoe@nanoq.gl