Kirsten & Freddy Johansenip aningaasaateqarfia, nunatsinni Peqqinnissaqarfimmi MR-scannerertaassamut qarasaasiakkullu sullississummut nutaamut, qinnguartaalluni assit atorlugit nappaatinik suussusersiniaanermi sakkussamut, annertuunik tunissuteqarpoq.

Kirsten aamma Freddy Johansen arlaleriarlutik sivisuumik angalallutik nunatsinniittarput. Peqqinnissamut tunngasutigut Danmarkimi nunatsinnilu nukittoorsaanissap aningaasaatqarfimmit soqutigineqarnera, Freddy Johansenip oqalugiaammini pingaartippaa.

”Nutaanngorsaaneq taama annertutigisoq, MR-scannerinerillu pitsaassusaat pineqarpata nunatsinni Peqqinnissaqarfiup siuarsimanerpaanut ilaalernera tulluusimaarutigaarput, pisortaaneq Tina Amondsen oqarpoq, imalu nangilluni; suliamik ingerlatsineq tamakkerlugu- MR-scannerip ikkusuunneqarnerani, Peqqinnissaqarfimmi sulisunik ilinniartitsinermi ilitsersuinermilu- Rigshospitalimi qinnguartaavimmi immikkut ilisimasallit qanimut suleqatigineqarput.”

MR-scannerertaap inissarsiuunniarneqarnera suliniutitut annertusimavoq. Nalinginnaasumik sulineq ingerlatiitigalugu, illup iluani sanaartornikkut annertuumik suliaqartoqarnissaanik piumasaqaatitaqarsimavoq. MR-scannerertaamik tunniussisumik (GE), Rigshospitalimi qinnguartaavimmik kiisalu Peqqinnissaqarfimmik namminermik qinnguartaavimmillu qanimut suleqateqarnerup, ingerlatsineq oqinnerulersippaa suliniullu naammassineqarluarsinnaanngorlugu.

”Maanna Rigshospitalimisut Dronning Ingridip Napparsimmavissuani MR-scanner atorlugu nappaatinik suussusersiniaasoqarsinnaanngorpoq”, qinnguartaanermut scannerinermullu immikkoortortami nakorsat qullersaat Martin Lundsgård oqarpoq, imalu nangilluni; “Dronning Ingridip Napparsimmavissuata Rigshospitalillu akornanni eqaatsumik suleqatigiinnerup, pilertortumik eqqortumillu nappaatinik suussusersiniaasinnaaneq qulakkeerpaa, misissuinerit amerlanerusut Nuummi ingerlanneqarsinnaanngormata Rigshospitalimut MR scannertikkiartotoqartariaarutissaaq”.

Tunissutip napparsimasorpassuarnut sunniuteqarnissaa qularutissaangilaq, Tina Amondsen erseqqissaavoq, suliniutillu tamatuma piviusunngortinneqarsinnaaneranut peqataasut tamarmik annertuumik qutsavigisassaapput.

PAASISSUITSSAQ:

MR-scannerinut tunngasoq

Magnetisk Resonans Imaging (assiliineq) naalisarlugu MR. MR-scanneri sakkortuumik saviup kajungerisaqarpoq, paasissutissanik nassiussuiveqarluni tigooraaveqarpoq qarasaasiaqarlunilu. Taakku immikkoortut suleqatigiissinneqarlutik, timip pisataanik timillu ipiutaasartaanik- annikitsortaat ilanngullugit- assiliisinnaavoq.