Hotel Hans Egede-imi pikkorissarnermi assilisaq.

3D-printerip suleriaaseq kigutileritittutullu misigisaq oqinnerulersissavai
Kigutigissaasut, kigutaasiortut kigutilerisullu Nuummeersut sinerissamilu allameersut pikkorissaanermi soqutiginneqalutik pimoorussillutillu peqataapput. Pikkorissaanermi kigutileriveqarfimmi sulisut kigutigissaaveqarfimmi atortut nutaanersannik: 3SHAPE TRIOS -3D printerimik atuisinnaaneq ilinniarpaat.

”Atortorissaarutitaarput, kigutaasiornermi atortussanik- soorlu kigutit qalliutaannik plastikkinik, kigutaasat ikaarutaannik, kigutit ilusaasa assinginik digitalinik- siunissamilu kigutaasanik ilusilersuisinnaasoq printerisinnaasorlu nuannaarutigeqaarput. Suli misileraagallarpugut, maannali Ilulissani kigutit qalliutaat siulleq ilusilerneqarlunilu printerneqareerpoq” -  Lone Mahnfeldt, Kigutilerisut qullersaat.

3SHAPE TRIOS -3D-printeri kigutit ilusaannik assiliisinnaasumik digitalimik scannereqarpoq. Tamanna ilaatigut meeqqat inersimasullu kigutit ilusaannik naqitsinissamut atortussanik oqumiartariaarunnissaannik sulisullu gipsimut kuisillutillu silisisariaarunnerannik kinguneqassaaq.




 

Assimi saamerlermi kiutileriveqarfimmi sulisut qarasaasiaq atorlugu ilusilersuipput.
Atortussat ilusilerneqareerpata 3D-printeri assimi talerperlermi takuneqarsinnaasoq atorlugu printerneqassapput.

Kigutilerinermi atortussat najukkami suliat
Atortorissaarut nutaaq atorlugu najukkami kigusiornermi atortussanik inuttaannut naleqqussaqqissaakkanik sananissaq suli ajornannginnerulissaaq. Taamaammat Kalaallit Nunaanni inuiaqatigiinnut, kigutileritinnikkut sullissinerit ataqatigiissinniarnerisa unammilligassaagajussinnaaffiani, atortorissaarut naleqqulluinnarpoq.

Aallaqqammut atortorissaarut nutaaq Nuummi Ilulissanilu atorneqassaaq, kingornali qitiusumik immikkoortuni illoqarfinnut allanut siammarneqarnissaa naatsorsuutigineqarpoq. Kigutileriviit taakku qitiusumik immikkoortumi immikkoortortat allat, ass. kigutaasanut kigutillu qalliutaannut tunngasutigut kiffartuussinnaassavaat.