” torsuusami uninngasoqartarneq, sivisuumik utaqqisarneq sulisussaaleqineq allanngortippagut, uninngasut angerlartullu oqimaaqatigiillualerput, suliffitsialanngorpugut sulisunit nuannarineqartoq” taama oqaluttuarpoq peqqissaasutut pisortaasoq Anne Birgitte Jensen.

Immikkuualuttut arlallit 
Sulisussarsiniarnermik ukkassineq immikkuualuttunik arlalinnik ilaatigut sulisut amerlineqarnerannik, aalaakkaasunik sulisoqarnerulernermik, napparsimasut aqqusaartugassaasa aaqqissuussaanerannik attaveqatigiinnerullu pitsaanerulersinneqarneranik katitigaq tassaavoq immikkoortortani M1-imi M2-milu immikkut nakorsiartitsivik ilanngullugu nunatsinni Peqqinnissaqarfimmi nakorsartittunut qitiusumik immikkoortumi malunnaatilimmik allannguinermut tunngaviusut ilaat.
” Sapinngisamik nakorsaanerit kissaatigisatsitut amerlassuseqarnissaat anguniarlugu immikkut ilisimasalinnik pissarsiniarluta annertuumik iliuuseqarpugut; tamanna sulianik annertunerusunik naammassisaqarsinnaanermut ilinniagaqassutsikkullu sullissinermi pitsaassutsip qaffasissuunissaanut annertuumik pingaaruteqarpoq ” Uka W. Geisler nakorsartittunut qitiusumik immikkoortumi nakorsatut pisortaasoq aallarniilluni taama oqarpoq. Imalu nangippoq; ”matumanili aamma nappaatinik suussusersiuinermi assigiissaakkanik periusissiorsimaneq, napparsimasunik maanga innersuussisarnerit sapinngisamik pitsaanerpaatinniarlugit maani nakorsaanerit sinerissamilu qitiusumik immikkoortuni nakorsat akornanni attaveqatigiilluarneq pineqarpoq. Maannalu aamma maani napparsimmavissuarmi nutaamik immikkut pisarialinnut, peruluttut uninngavianniittariaqanngitsunut ammali immikkoortortamiinnissamut nakkutigisariaqarnerusunut paaqqutarinniffimmik immikkoortortaqalerpugut, Uka nangilluni nassuiaavoq ”.

Sulisut naammagisimaarinnittut
pissutsit pitsaanerulersimanerat nakorsaanerup Alice Juhl Petersenip malugisinnaavaa. Taanna 1992-imiilli nakorsartittunut qitiusumik immikkoortumut atassuteqarpoq ukiullu marluinnaat matuma siorna sullivimmi pissutsit qanoq ittuunerat eqqaamavaa.
”Taamanikkorniit ilungersortitaannginneruvugut. Maanna napparsimasut immikkoortortatsinnut suli takkutinnginneranni aqqusaartugassaat ersarinnerujussuanngorput, napparsimasut nakorsartinnerminni ingerlaqqilertortarnerat aqqusaartugassaasalu aaqqisuulluagaanerat, napparsimasumullu tamanna iluarinarpat nakorsatut peqqinnissakkullu sullissisutut allatut aamma naammagisimaarnassaaq. Tamanna suleqatigiissutigisallu pitsaasumik ingerlanerat kikkut tamarmik – sulisut aqutsisullu- siornatigumut pingaartumik angummaniartarnermut sanilliullugu- inerisaanermik annertunerusumillu pitsanngorsaanernik ukkassisinnaanissannik isumaqarpoq, ” Alice oqaluttuarpoq.

Alloriarneq tulleq
Qitiusumik immikkoortumi iliuusissat tulliuttut suunerannik apeqqummut tunngatillugu, pisortaqarfinnik suleqatigisartakkanillu allanik suleqateqarneq immikkut ukkanneqartoq, peqqissaasutut nakorsatullu pisortaasut akipput.
” Ukiuni kingulliuinerusuni ilutsinni napparsimasunik nakorsaanermut tunngatilugu aqqusaartugassanik pitsanngorsaanermik ukkassisimanitta kingunerisai iluaqutaalersut oqartoqarsinnaavoq. Ass. kommunit peqatigalugit napparsimasut maanngaanniit angerlatitaaneranni –tamatigut suliamik tigusisoqarluni innuttaasup ingerlaqqinnissaanut ikiuuttussanik isumaginnittoqarsinnaaqqullugu avataani aqqusaartugassanik nukittorsaanissaq tullinnguutissaaq”, Anne Birgitte Jensen naggasiivoq.

Qanga pissutsit sulisunut napparsimasunullu qanoq innerat nakorsartittunut qitiusumik immikkoortumi nakorsatut pisortaasup Uka W. Geislerip nakorsaanerullu Alice Juhl Petersenip eqqaamavaat immikkoortortanilu M1-imi M2-milu avatangiisit allanngornerat nuannaarutigalugu.

Dronning Ingridip Napparsimmavissuani M1-imi M2-milu ullaap tungaa nalinginnaasoq. 

 
Nalunaarut una pillugu saaffiginnissutit uunga innersuunneqarput: Sundhedsledelsen@peqqik.gl