Ilinniartitaanermik nutaamik suliaqarneq Danmarkimi Region Hovedstaden, pilattaavimmi peqqissasutut ilinniartitaanermik aallartitsiviulersortaaq, suleqatigalugu ingerlanneqarpoq. 
- peqqissaanermik immikkut ilisimasalimmik Danmarkimi ilinniartitaanermi siunnersuisooqatigiinnut ilaasumik, ilinniartup piginnaasaanik naliliinermi nalunaarsukkanik (kompetencekort) pissarsiarineqartussanik inerisaaqataasumik, taartaagallartutut sulisoqarsimanitsigut iluatitsilluarsimaqaagut. Taamaalilluta suliamik aallartitsinissamut naatsorsuutiginngisatsinnik ikiorneqarpugut, immikkoortortami peqqissaasutut aqutsisoq Maja Chemnitz Frederiksen ilinniartitaanermik nutaamik suliniuteqaqataasoq oqaluttuarpoq.

Pilattaavimmi peqqissaassuuneq – immikkut ilisimasaqarfik pingaarutilik 
Pilattaavimmi peqqissaasuuneq immikkorluinnaq ittunik ilisimasaqarfiummat Danmarkimi nunatsinnilu pilattaavimmi peqqissaasutut ilinniartitaanissaq piffissami sivisuumi kissaataasimavoq. 
-immikkut ilisimasaqarfinnit allanit allaassuteqaqaaq ilinniagaqarfittullu allatuulli ilinniagaqassutsikkut assersuussiviusinnaasumik pitsaassutsikkut piumasaqaatitalimmik pitsaassutsimillu qulakkeeriviusumik aaqqisuussamik ilinniartitaanissaq pingaaruteqarpoq. Taamatuttaaq akuerineqarnissaq immikkullu piginnaasat tunngavigalugit akissarsiaqarnissaq pingaaruteqarpoq, peqqissaasuunertut pisortaq Arnaq Fleischer Hansen nassuiaavoq. 
Pilattaanernut annikitsunut tunngatillugu, sinerissami qitiusumik napparsimmaviit, Nuummi pilattaavimmi peqqissaasunit ukiup ingerlanerani tikinneqarnikkut siunnersorneqarnerup, ilitsersorneqarnerup paasisanullu nutaanerpaanut tunngatillugu ikiorneqarnerup pingaaruteqassusaat, peqqissaasuunerup qitiusumik immikkoortumi pisortaasup nassuiaatigaattaaq. 

Piginnaasatigut naliliinermi nalunaarsukkat (kompetencekort) 
Ilinniartitaanermi tunngaviusoq tassaavoq pikkorissartut piginnaasatigut naliliinermi nalunaarsukkanik sisamanik pissarsinissaat, pikkorissartullu ilaat Julie Berantzino-Folnæs naapertorlugu immikkoortoq siulleq nammineq iliuuserisanut isummanullu oqaasertaliinissamut atuagarsornikkullu ilisimasanik tunngaviliinissamut iluaqutaasimavoq.
- isumassarsinarpoq tamarmillu assigiinnik piginnaaneqarnissaannik qulakkeerinerulluni. Aaqqisuussaanerulissaaq. Suna pillugu taamaaliortarneq pillugu eqqarsaatersortariaqalernarpoq. Ilinniarnerup sinnera qilanaareqaara, Julie pinasuagassanut immikkoortortami 2017-imiilli sulisimasoq taama oqaluttuarpoq.
Ilinniartitaanermik inerisaaneq ukiuni tulliuttuni marlunni ingerlanneqassaaq piginnaasatigullu nalunaarsukkat ilinniartunit sisamaasunit pissarsiarineqartussat makkununnga tunngassuteqassapput: Pilattaavimmi peqqissaasup suliassaqarfii, suleqatigiinneq, napparsimasunik sullissinermi isumannaallisaaneq kiisalu pilattaavimmi peqqissaanermi pitsaassutsimik annertusaaneq ilisimatuussutsikkullu uppernarsaaneq.

Julie-ip suleqatini pingasut peqatigalugit ilinniarnerup immikkoortua siulleq pingasunngornermi maajip ulluisa 26-ianni 2021 naammassivaa.
Assimni takuneqarsinnaapput: Paarnaq Larsen Strøm, Julie Berantzino-Folnæs, Hanne Egede, Lissi Ottosen talerperlerlu ilinniartitsisoq Monica Kegel Dalsgaard.

Nalunaarut una pillugu saaffiginnissutit uunga innersuunneqarput: Sundhedsledelsen@peqqik.gl