Nunatta avataaniit Danmarkimiillu atorfinititsinissami suliat sivikinnerusumik ingerlanneqartalernissaat
Februaarip ulluisa aqqarnanni Naalakkersuisut Danmarkimilu Udlændinge og Integrationsministeriap akornanni isumaqatigiissut atuutilerpoq. Isumaqatigiissusiornikkut peqqinnissakkut sullissisunut nunanit allaneersunut sulianik najugaqarnissamut – sulisinnaanissamullu akuersissummut tunngasunik ingerlatsineq sivikillivoq.
- Sulianik ingerlatsineq qaammatip missaanik sivikillivoq, sulisoqarnermut pisortaq Michael Egense aviisimut Sermitsiamut oqarpoq. Suliamik ingerlatsinerup maanna sulisup tikereernerani ingerlanneqarsinnaanngornera isumaqatigiissummut ilaavoq.
Isumaqatigiissut nutaaq Fast Track pillugu aviisimi Sermitsiami kingullermi (februaarip ulluisa 26-ianni saqqummersumi) annertunerusunik paasisassarsiorsinnaavutit.
Nunani Avannarlerni innuttaasut (danskit/savalimmiormiut, svenskit, norgimiut, finlandimiut islandimiullu) najugaqarnissamut -sulisinnaanissamullu akuersissuteqartariaqannginnerat maluginiarneqassaaq.