Tikereernermiit ullut tallimat qaangiunneranni misissortinnissamut periarfissaq pillugu sapaammi septembarip ulluisa 20-anni paasissutissiisoqarnissaa naatsorsuutigineqassaaq
Nunatsinni Nakorsaanerqarfiup Naalakkersuisullu tusagassiorfinnut nalunaarutaanni tallimanngornermi septembarip ulluisa 18-ianneersumi, inunnik pingasunngornermi septembarip ulluisa 16-ianniit nunatsinnut tikittunik misissuinermut tunngasumi ilisimatitsissutaasutut, ullut tallimassaanni misissortinnissaq ataasinngornermi septembarip ulluisa 21-anniit periarfissanngussaaq.
Periarfissap tamatuma sapaammi septembarip ulluisa 20-anni annertunerusumik paasissutissiissutaanissaa naatsorsuutigineqarsinnaavoq. Taamaammat Peqqinnissaqarfik piffissamik inniminniiniarluni sianertoqaqqunagu sapaammili sukumiinerusumik paasissutissiisoqarnissaa utaqqimaaqqullugu innuttaasunut kajumissaarivoq.
Coronavirusimik tunillatsissimasinnaanerit pasitsaakkukku takkutsinnak sianeqqaarit
Coronavirusip siaruaassinnaanera pitsaalioruk – takkunnak - sianerit.
Napparsimmavimmut, peqqissaavimmut imal. coronavirusimik tunillatsissimasoriguit/COVID-19-imik nappaateqarsoriguit ajoqusersimasunut nakorsiartafimmut takkutissanngilatit. Tamatumunnga taarsiullugu Peqqinnissaqarfimmut sianissaatit. Oqarasuaatip normua uani nassaariuk
Coronavirus pillugu apeqqutissaqaruit – Nunatsinni Nakorsaaneqarfiup nittartagaa: nun.gl. alakkaruk. Corona-pillugu sianerfissamut: 80 11 00 sianerit imal. e-mailimik uunga nassiussigit: corona@nanoq.gl
Tusagasiorfinnut nalunaarut una pillugu apeqqutissaqartut uunga attaveqassapput: Sundhedsledelsen@peqqik.gl