- ”Uninngasut sulisullu akornanni attaveqaqatigiinneq imminnullu paaseqatigiissinnaanerat uninngasut pitsaasumik misiginissaannut pingaaruteqarluinnarput. Atuagaq assitalersorluagaasoq oqaatsillu pingasut atorlugit pissarsiarineqarsinnaasoq atorlugu uninngasut sulisullu akornanni oqaloqatigiittarnermik pitsanngorsaasinnaasoq neriuutigaara. Nunani Avannarlerni Ministerit Siunnersuisoqatigiivi saqqummersitsinermut tapersersuinerannut annertuumik qutsavigineqassapput," Peqqissutsimut, Isumaginninnermut Inatsisinillu Atuutsitsinermut Naalakkersuisoq, Martha Abelsen oqarpoq.

Oqaloqatigiinnermi najoqqutassaq napparsimavimmi Kalaallisut/Qallunaatut oqalunniutinit, 1987-imi Kalaallit Nunaannut Ministeriaqarfimmit saqqummersinneqarsimasunit isumassarsiaavoq.

Atuakkami napparsimavimmi ulluinnaat tunngavigineqarput aamma oqaatsini pingasuni taaguutinik oqariartaatsinillu atorneqarnerpaasartunik kiisalu assinik oqaloqatigiinnermut iluaqutaasinnaasunik imaqarluni. Atuagaq Kalaallit Nunaanni peqqinnissamut ilaqutariinnullu tunngasunik aamma oqaatsinik atuinani attaveqaqatigiinnermik naatsumik ilisarititsinermik imaqarpoq.

Oqaloqatigiinnermi najoqqutassap oqalutsip atuuffia taarsersinnaanngila aamma taarsissanngilaa. Napparsimasut kalaallisut oqaluttut napparsimavimmilu sulisut qallunaatut tuluttulluunniit oqaluttut akornanni oqaloqatigiinnermut iluaqutissatut sakkussatut isigineqassaaq.

Najoqqutassaq Christian F. Reximit kusanartumik assitalersugaavoq Maria Motzfeldtimiillu ilusilersorneqarluni. Ingelise Olesen aamma Malik Milfeldt najoqqutassap imaanut kulturimut tunngasunik ilanngussaqarsimapput.

”Napparsimavimmi – uninngasunut sulisunullu oqaloqatigiinnermut atuagaq" nunatsinni Danmarkimi Islandimilu napparsimavinnut peqqissaavinnullu tamanut nassiunneqarpoq.

Najoqqutassaq Peqqik.gl-imi elektroniskinngorlugu aaneqarsinnaavoq. Uani atuaruk.

Paasisaqarnerorusukkuit naalakkersuisup allattaa Inger Heilmann Larsen e-mail: ihla@nanoq.gl imaluunniit oqa. +299 346495 aqqutigalugit attavigiuk.