Coronavirus pillugu inatsisiliorneq aalajangiunneqarpoq
Naalakkersuisut ulloq 2. marts 2020 COVID-19 (Corona Virus Disease 2019) allattuiffik A-mi nappaatinut uloriarnartunut nalinginnaasumik isigineqartunut ilanngunneqarpoq. COVID-19 coronavirus-imik nutaavimmik peqquteqarpoq. Taamaasilluni Nappaatit tunillaassortut akiorniarlugit iliuutsit pillugit Inatsisartut peqqussutaannut nr. 20-mut, 12. november 2001-imeersumut ilanngussap 1-ip allanngortinneqarnissaanik Naalakkersuisut akuersissutigaat.
Tamanna isumaqarpoq aalajangiinissamut oqartussaassuseq inatsisitigut erseqqissumik Tunillaassortunik Nappaalanersuaqarneranut Ataatsimiititaliarsuarmi inissisimasoq aamma nappaatip siaruaannissaa pakkersimaarsinnaallugu, tuniluunneq paasiniarsinnaallugu il.il.
Tuniluunneq nunanut amerlasuunut siaruaassimavoq, kisianni Kalaallit Nunaanni tunillatsittoqarsimaneranik paasisaqartoqanngilaq.
Nunatta Nakorsaaneqarfiata nittartagaani anersaartuutitigut tappiorannartumik tunillatsissinnaaneq pinaveersaarniaraanni innersuussutit nalinginnaasut nassaarineqarsinnapput.
Iliuuserineqarsinnaasut assersuutitut makkuusinnaapput;
Assaat asattarnikkut immaqaluunniit assaat panerlutillu eqqiluippata tappiorannartuiaammik atuinikkut eqqiluitsuutittuarnissaat
Inunnut nuattunut/anersaartuutimikkut aseruuttoornermut ersiutilinnut attaveqarnaveersaarneq
Kakkissarfimmut igitassamut imaluunniit ikutsivit peqittarfianut quersorlutilluunniit tangajortarit.
Inuit arlallit attortagai akulikitsumik tappiorartartuiaammik allarterlugi (matserfiit, allattaaviit, printer-it).
Coronavirus pillugu paasissutissat allat uani atuarneqarsinnaapput:
https://nun.gl/Nyheder/2020/02/Aktuel%20information%20om%20coronavirus?sc_lang=kl-GL
Paasissutissat allat naalakkersuisumut allatsi Inger Heilmann Larsen oqarasuaat +299 55 41 60 imaluunniit e-mail ihla@nanoq.gl aqqutigalugit pissarsiarineqarsinnaapput.