Assi: Daana R. Geisler

- Sumiifffinni tamani suliat ingerlanneqartut annertuut akuersaarnissaat pingaaruteqarluinnarpoq. Assigiinngissutsit annertuut kulturitsinnut nukittoqutaapput. Tamaviaanartunut tunngatillugu ataatsimoorneq nukittorsarniarlugu arlatta misilittagaat ilinniarfigissavagut. Meeqqat tamarmik inuunerissusaannik, ineriartornerannik, ilikkagaqarnissaannik, eqqarsartaatsikkullu peqqissuunissaannik siuarsaasumik inunngornermiit peqqinnartumik inuuneqarnissaat ataatsimoorluta suliniutigissavarput, Peqqissutsimut, Isumaginninnermut Inatsisinillu Atuutitsinermut  Naalakkersuisoq, Martha Abelsen oqarpoq. 

Kommunini ingerlatsiviit akimorlugit– kommunimi, politiini, peqqinnissaqarfimmilu aqutsisut naapillutik, kommuniminni peqqissuunissaq anguniarlugu suliniutit pitsaaliuinerlu pillugit unammilligassat periarfissallu oqaluuserinissaannut suliap aallartinneqareersup ikorfartornissaa angalanermi siunertaavoq. Sumiiffinni tamani pitsaaliuineq peqqissuunissarlu pillugit akimuilluni suleqatigiinnissamut akisussaaffimmik tigusinissamut kajumissuseqarneq soqutiginninnerlu annertuvoq.

Aqutsisoqatigiilluni oqallinnerni, kommunini ataasiakkaani ilinniartitaanerup-, inunnik isumaginninnerup-, peqqinnissap politiillu akornanni peqqissuunissaq anguniarlugu suliniuteqarnerni pitsaaliuinermilu, ingerlatsiviit akimorlugit ataqatigiissaarinermik qulakkeerinissaq siunertaavoq. Anguniagaq pingaarutilik alla tassaavoq peqqissuunissamik suliniuteqarnermi pitsaaliuinermilu iliuuseqarnerit naginnissaannut kommunit ilisimatusarnermik toqqammavilimmik aallaaveqarnissaannik qulakkeerinissaq. 

Ingerlatsiviit akimorlugit aqutsisoqatigeeqarneq suliniutaavoq Naalakkersuinikkut Ataqatigiissaarisoqatigiinnit 2017-imi akuersissutaasoq. Taamanili Paarisap Peqqissutsimullu Naalakkersuisoqarfiup tamatuma- kommunini sisamani pilersinneqartup- piviusunngortinnissaa suliniutigaat. 

Angalanermi Avannaata Kommuniani, Kommune Qeqertalimmi Qeqqatalu Kommuniani aqutsisut kommunalbestyrelsii ataatsimeeqatigineqarput. Innuttasut peqqissusaannut tunngatillugu kisitsisit nutaanerpaat oqallisiginerisa saniatigut, peqqissuunissaq anguniarlugu suliniuteqarnermi kommunit ataasiakkaat naleqartitaasa nukissaasalu oqaluuserinissaat piffissaqarfigineqarpoq. 

Iliuuseqartussat tamarmik namminneq najukkami pitsaaliuinermik peqqissuunissamillu  suliniuteqarnerminni nukittussutsiminnik misilittakkaminnillu pitsaasunik atuinissartik pikkoriffiginerussagaat isumaqatigiissutaavoq. Sammisat oqaluuserineqartut ilaat tassaapput ass. inuusuttut akornanni imigassartornermut atatillugu ileqqut- ass. meeqqat atuarfianni naammassilluni soraarummeernermi eqqunneqartarnerisa misissuiffiginissaasa pingaaruteqarnera, qaqugu inersimasunngornissap apersortinnerullu inersimasutut ikaarsaarnermut malunnartitsiniarnerunnginnerata oqaluuserinissaasa pingaaruteqarnerat. Meeqqat inuusuttullu aalanissamut peqqinnartunillu nerisaqarnissamut periarfissaannut toqqammavissat erseqqissarneqarputtaaq. Tassani pinngortitap inuunerissutsitsinnut peqqissutitsinnullu pitsaasumik sunniuteqarnera immikkut pingaartinneqarpoq.   

2018-imi innuttaasut peqqissusaannik misissuisitsineq uani atuarneqarsinnaavoq:
https://www.sdu.dk/da/sif/rapporter/2019/befolkningsundersoegelsen_i_groenland

HBSC 2018-imi meeqqanik atuartunik misissuisitsineq uani atuarneqarsinnaavoq:
https://www.sdu.dk/da/sif/rapporter/2019/hbsc_greenland


Paasissutissat sukumiinerusut Paarisami ingerlatsiviit akimorlugit siunnersorti Kirsten Fencker oqarasuaatikkut: +299 34 69 06 imal.e-mailikkut: kfen@nanoq.gl attavigalugu pissarsiarineqarsinnaapput.