Peqqinnissaqarfimmi Diskomi ernisunik sullissinerup allanngortinneqarallarnissaa
Peqqinnissaqarfimmi Diskomi piffissami sivisuumi nakorsanik ataavartunik atorfeqartitsiniarneq unamminiarnarpoq. 2019-imi februaarip aallaqqaataat aallarnerfigalugu Aasianni qitiusumik napparsimmavik pilaalluni ernisitsisinnaasunik erninermullu atatillugu aanaartoqarnerani ikiuussinnaasunik sulisuerutissaaq. Taamaalilluni napparsimmavik ernisarfinnut isumannaallisaanikkut sillimaniarnikkullu piumasaqaatinik eqqortitsiunnaassaaq, taamaattumillu Peqqinnissaqarfimmi Diskomi ernisussanik sullissineq 2019-imi januaarip qiteqqunneraniit allanngortinneqarallassaaq.
Assi: Ulrik Bang
Ernisussanik sullissinerup allanngortinneqarallarnerata kingunerisaanik Peqqinnissaqarfimmi Diskomi naartusut, februaarip aallaqqaataata kingorna ernisussat Aasiannilu Qitiusumik Napparsimmavimmi ernisussaagaluit Ilulissani Qitiusumik Napparsimmavimmut Nuummulluunniit, erninermut atatillugu pisariaqartunik piginnaaneqarfiusunut, erniartortinneqartalissapput.
Aaqqiissutaagallartoq ukioq ataaseq qaangiuppat nalilersorneqassaaq. Aaqqiissullu qaammatini qulini atuutereerpat nalilersuineq aallartinneqassaaq.
Piffissami 1. oktober 2017-imiit 30. september 2018-imut Peqqinnissaqarfimmi Diskomi naartusut 92-iupput, taakkunannga 49-t Aasiammiuupput, 43-llu nunap immikkoortuani illoqarfinneerlutillu nunaqarfinneerput. Piffissami tamatumani Aasianni ernisut 51-iupput sinnerilu tamangajammik Nuummut erniartorsinneqarsimallutik
- Ernisussap isumannaatsumik atugaqarnissaa qulakkeerniarlugu ajoraluartumik sulisunik atorfinitsitsisinnaanngimmat Peqqinnissaqarfimmi Diskomi ernisussanik sullissineq allanngortinneqarallarpoq. Allannguutip naartusunut ilaqutaasunullu, Aasianni erninissamik naatsorsuuteqartunut, sunniuteqarnera paasilluarsinnaavara. Taamaattorli naartusut taakkualu ilumiui suli inuusimanngitsut isumannaatsuunissaat taamaallaat eqqarsaatigalugu taamatut aalajangiisoqarnera erseqqissaatigissallugu uannut pingaaruteqarpoq, taama oqarpoq Peqqissutsimut Naalakkersuisoq, Martha Abelsen.
Naalungiarsuit toqusartut ikilisarniarlugit 2003-mi peqqinnissaqarfik malittarisassiorpoq. Malittarisassiani, nunani avannarlerni piumasaqaatit tunngavigalugit suliarineqarsimasuni, piumasaqaatigineqarpoq napparsimmavik ernisarfittut atorneqarsinnaassappat sulisut sunik piginnaasaqassanersut.
• Sulisut erninermut tassanngaannartumik ajornartoornerit assigiinngitsut, tassunga ilagitillugit aanaalernerit, pilattaalluni ernisitsinerit aamma inoorlaap arlaatigut ajornartoornera, isumagisinnaasariaqarpaat. Ajornartoornerit anaanaasup meeraasullu toqunerannik kinguneqarsinnaasut.
• Taamaattumik piumasarineqarpoq ernisarfinni minnerpaamik pilattaalluni ernisitsisinnaasumik nakorsaqassasoq, sinitsitsisartumik peqqissaasoqassasoq, bioanalytikereqassasoq kiisalu juumooqassasoq.
Peqqinnissaqarfimmi Diskomi ernisunik sullissinerup allanngortinneqarneratigut arnat nalinginnaasumik ernisussatut naatsorsuutigineqartut Ilulissanut nuutsinneqartalissapput naartusullu erninermi ajornartooratarsinnaasut pisarnertut Nuummi Dronning Ingridip Napparsimmavissuanut erniartortussatut innersuunneqartalissallutik.
Aasianni qitiusumik napparsimmavimmi juumuumik nunap immikkoortuani naartusunik sullissisinnaasumik, tassunga ilagitillugu oqaloqateqarsinnaasumik, naartunermik misissuisinnaasumik aamma MANU angajoqqaanngornissamut piareersarnermik ingerlatsisinnaasumik, atorfeqartitsiinnartoqassaaq.
Peqqinnissaqarfiup qullersaqarfiata aalajangiineq pillugu Aasianni innuttaasut oqaloqatigerusukkamigit novembarip qiteqqunnerani Aasianni soqutiginnittunut tamanut innuttaasunik ataatsimiisitsinissani pilersaarutigaa.
Paasisaqarnerujumallutit attavigiuk Naalakkersuisoqarfimmi Pisortaq Tine Pars oqarasuaat: +299 34 66 25 imaluunniit e-mailikkut: tine@nanoq.gl