Assi: Emil Nørgaard Stach

Maligassiuisut Show-imi inuit timersornerup peqqinnerullu iluani immikkut iliuuseqartut, tamatsinnullu isumassarsisitsisinnaasut saqqummiunniarpavut, nalliuttorsiutiginiarpavut nersorniarlugillu. Ukioq manna tamanna ukiut sisamassaat ingerlanneqarpoq.

Arfininngorneq novembarip 17-ianni nal. 19.00 Maren-Louise Poulsen aamma Angajo Lennert Sandgreen KNR-ikkut toqqaannartumik takutitsinissamut tikilluaqqusissapput. Unnummi piumassuseqarluartut maligassiuisullu toqqarneqalerpata aliikkusersuisoqarumaarpoq pissangaammernartumillu pisoqartarumaarluni.

Unnuup ingerlanerani akissarsiassat arlallit tunniunneqassapput. Peqqissutsimut Naalakkersuisoqarfiup timip aalatinnerunissaanut unammisitsinermi ajugaasut toqqassavai, aamma Atuarfittut eqeersimaartutut, Suliffeqarfittut eqeersimaartutut inuiaqatigiinnilu eqeersimaartutut toqqarneqartut akissarsisissavai. 

Kalaallit Nunaanni Timersoqatigiit Kattuffiat Faxe Kondi suleqatigalugu ukiumi timersullammammut, ukiumi sungiusaasullammammut aamma ukiumi siulersuillammammut legatimik akissarsisitsissaaq. Elite Sport Greenland-ip ukiumi takutitsilluarnermut nersornaat aamma ukiumi piukkunnaatilimmut akissarsiassat tunniutissavai. 

Ukioq manna Kalaallit Nunaanni Timersoqatigiit Kattuffiata aamma Danske Spilip ukiumi timersornermi ataatsimoornermik akissarsiassaq nutaaq aamma tunniutissavaa. Novembarip aallaqqaataata tungaanut videomik nassitsinikkut klubbimik imaluunniit ataatsimoornermik siunertaqartumik akissarsisussamik Kalaallit Nunaanni Timersoqatigiiffiit Kattuffiannut innersuussisinnaavutit. Tamatuma kingorna kikkut tamarmik ataatsimoornermut tunngasumut ajugaasussamut piukkussaminnut toqqaasinnaapput.

Akissarsisitsineq aliikkusersuinertaqassaaq ilaatigut Qiajuk, Tiu, Varna allarpassuillu peqatigalugit. Pisarnertut isiginnaartut tupaallaatigisassaanik pisoqartarumaarpoq, taamaattumik arfininngorneq 17. november 2018 nal. 19.00 – 20.30 Katuami Maligassiusut Show imaluunniit angerlarsimaffinni KNR-ikkut toqqaannartumik aallakaatinneqalerpat peqataagit. 

Paasissutissat allat piniarukkit attavigiuk:

Peqqissutsimut Naalakkersuisoqarfik: Paasissutissalerisoq Ea Cecilie Aidt oqarasuaat 34 66 11 imaluunniit eaca@nanoq.gl 

GIF/ESG: Pilersaarusiornermut siunnersorti Christina Tønder Bell oqarasuaat 34 81 53 imaluunniit christina@gif.gl